მათ, ვინც ოსკარის დაჯილდოებას თვალს აქტიურად ადევნებს, ნამდვილად ემახსოვრება 2022 წლის ინციდენტი, როდესაც უილ სმიტმა კომიკოს კრის როკს სახეში გაარტყა. როკმა ჯეიდა პინკეტ სმიტის გადაპარსულ თავზე იხუმრა, რის გამოც მისი ქმარი, უილ სმიტი, სცენაზე ავიდა და როკს სახეში გაარტყა. ცნობილია, რომ ჯეიდა პინკეტ სმიტს ავტოიმუნური დარღვევა, ალოპეცია აქვს, რის გამოც თმა გასცვივდა.

ბოლო ინტერვიუში ჯეიდამ გაამხილა, რომ ის და სმიტი უკვე 7 წელია დაშორებულები არიან და ცალ-ცალკე ცხოვრობენ. მისი თქმით, აქამდე ამის გასაჯაროებისთვის მზად არ იყვნენ. ჯეიდამ დაშორების მიზეზებზეც ისაუბრა.

"ვფიქრობ, ორივე ჩვენ-ჩვენ ფანტაზიებში ვცხოვრობდით და წარმოვიდგენდით, როგორი გვინდოდა, ჩვენი პარტნიორი ყოფილიყო", — აღნიშნავს მსახიობი.

ჯეიდას თქმით, ისინი ოფიციალურად განქორწინებას არ გეგმავენ. წყვილი ერთმანეთს 1994 წელს შეხვდა, 3 წლის შემდეგ კი დაქორწინდა და ორი შვილი ჰყავთ.

ჯეიდამ ასევე აღნიშნა, რომ ყოველ ზაფხულს ვრცელდებოდა ჭორები იმის თაობაზე, რომ ის და სმიტი განქორწინდნენ. ერთ-ერთი ასეთი შემთხვევის დროს კრის როკმა ის პაემანზე დაპატიჟა, მას შემდეგ კი, როცა გაიგო, რომ განქორწინება ჭორი იყო, ბოდიში მოუხადა.

ოსკარზე მომხდარი ინციდენტის შემდეგ უილ სმიტმა ჰოლივუდის კინემატოგრაფიული ხელოვნებისა და მეცნიერების აკადემია დატოვა. ის ოსკარის დაჯილდოებას მომდევნო 10 წელი ვეღარ დაესწრება. მსახიობმა ბოდიში მოუხადა, როგორც ოსკარის დაჯილდოების მაყურებლებს, ასევე კრის როკსაც. სმიტმა სოციალურ ქსელებში განცხადება გამოაქვეყნა, რომელშიც საკუთარ ქმედებას არასწორი უწოდა და ძალადობა დაგმო.