სულ ცოტა ხნის წინ ლიტერატურის დარგში ნობელის პრემიის 2023 წლის ლაურეატი დასახელდა. ყველაზე პრესტიჟულ პრემიად აღიარებული ჯილდო ნორვეგიელ პროზაიკოსსა და დრამატუგს, იუნ ფოსეს, ერგო.

ფოსეს პრემია გადაეცა "მისი ნოვატორული პიესებისა და პროზაული ნაწარმოებებისთვის, რომლებიც რთულად სათქმელს ახმოვანებენ". ნობელის კომიტეტი ხაზს უსვამს ავტორის თხრობის სტილსაც, რომელსაც "ფოსესეულ მინიმალიზმს" უწოდებენ.

64 წლის იუნ ფოსეს შემოქმედება 40-მდე პიესას, რომანებს, ლექსებს, ესეებს, საბავშვო წიგნებსა და თარგმანებს მოიცავს.

აღსანიშნავია, რომ ნორვეგიელ ავტორს წინა წლებშიც უწინასწარმეტყველებდნენ ნობელის ლაურეატობას.

იუნ ფოსეს პიესა საქართველოში პირველად გასულ წელს დაიდგა, როცა სამეფო უბნის თეატრმა მაყურებელს სპექტაკლი მკვდარი ძაღლები წარუდგინა (რეჟისორი — დავით ხორბალაძე).

ფოტო: David Levene / Redux

ნობელის პრემია მსოფლიოში ერთ-ერთი ყველაზე გავლენიანი საერთაშორისო ჯილდოა, რომლის დაარსებაც შვედი ქიმიკოსის ალფრედ ნობელის სახელს უკავშირდება. პრემია 1901 წლიდან გაიცემა ქიმიის, ფიზიკის, ლიტერატურის, მშვიდობისა და ფიზიოლოგია/მედიცინის დარგში. პრემიის მფლობელებს 9 მილიონი შვედური კრონა გადაეცემათ, რაც, დაახლოებით, ერთ მილიონ დოლარს უდრის.

ლიტერატურის დარგში ნობელის პრემია წინათ მიღებული აქვთ ისეთ ცნობილ ავტორებს, როგორებიც არიან ჰაინრიხ ბიოლი (1972), ჟოზე სარამაგუ (1998), მარიო ვარგას ლიოსა (2010) და სვეტლანა ალექსიევიჩი (2015).

გასულ წელს პრემია ფრანგმა მწერალმა ანი ერნომ მიიღო.

თუ წიგნების კითხვა და მათი განხილვა არასდროს გბეზრდება, შემოგვიერთდი ჯგუფში ერთი გვერდიც და...