ცოტა ხნის წინ პარიზში ბალენსიაგამ 2024 წლის ზაფხულის კოლექცია წარადგინა. 2024 წლის ახალი კოლექციის ჩვენება დემნას დედამ გახსნა. ამ ფაქტს დემნას ძმა, გურამ გვასალია, სოციალურ ქსელებში გამოეხმაურა.

"ვამაყობ, რომ ბალენსიაგას შოუ დედამ გახსნა. ძალიან სამწუხაროა, რომ არ დამპატიჟეს, რათა პირადად მენახა. ვლოცულობ ჩემი ძმის სულისთვის. ღმერთმა დალოცოს იგი", — წერს გურამ გვასალია ინსტაგრამზე.

შეგახსენებთ, რომ რამდენიმე თვის წინ Vetements-ის აღმასრულებელმა და შემოქმედებითმა დირექტორმა, გურამ გვასალიამ, New York Times-თან ვრცელი ინტერვიუ ჩაწერა, რომელშიც დემნას კარიერული მიღწევებისა და მასთან ურთიერთობის შესახებაც რამდენიმე კომენტარი გააკეთა.

"ჩემი ძმა ჩემზე 6 წლით უფროსია. როცა მე მეორე კლასში ვიყავი, ის მერვეში იყო. გარკვეული შესაძლებლობები მან ცხოვრებაში უფრო ადრე მიიღო. მაგრამ თუ გავითვალისწინებთ, სად ვარ მე ახლა და სად იყო ჩემი ძმა ჩემს ასაკში, ვფიქრობ, რომ მასზე გაცილებით წინ ვარ", — ამბობს გურამ გვასალია დემნას შესახებ.

Vetements დემნამ და გურამ გვასალიამ 2013 წელს დააარსეს. ბრენდმა წარმატებას მალევე მიაღწია და პოპულარულიც გახდა, თუმცა დემნამ 2019 წელს Vetements დატოვა და განაცხადა, რომ Vetements-ში თავისი მისია უკვე შეასრულა

"ვფიქრობ, რომ ჩემი ძმა ძალიან ნიჭიერია, მაგრამ მთელი რიგ საკითხებთან დაკავშირებით მე განსხვავებული მიდგომა მაქვს. მისი ეპოქა ნელ-ნელა დასასრულისკენ მიდის, ახლა ჩემი დროა. ჩემს ძმას უკვე დიდი სახელი აქვს და ჩემს ცხოვრებაში მისი არსებობა კიდევ უფრო დიდი გამოწვევაა. არ არის საკმარისი, რომ უბრალოდ კარგი ვიყო. მჭირდება, რომ ძალიან კარგი ვიყო", — დასძინა გურამ გვასალიამ.

Vetements-ს დატოვების შემდეგ დემნამ კარიერული მოღვაწეობა ბალენსიაგაში გააგრძელა, ძმებს შორის უთანხმოების შესახებ კი მედია დიდხანს ლაპარაკობდა.

ასევე იხილეთ: