28 სექტემბერს ცნობილი ირლანდიელი მსახიობი სერ მაიკლ გემბონი 82 წლის ასაკში გარდაიცვალა. ის საავადმყოფოში პნევმონიის გართულების შედეგად დაიღუპა.

გემბონს მაყურებელთა დიდი ნაწილი ჰარი პოტერის ფილმებში მონაწილეობით იცნობდა. მსახიობი პოტერიადის მესამედან მერვე ფილმამდე ჰოგვორტსის მაგიისა და ჯადოქრობის სკოლის დირექტორს, ალბუს დამბლდორს, ასახიერებდა. როლზე გემბონი მას შემდეგ დაამტკიცეს, რაც პირველ და მეორე ფილმში პერსონაჟის შემსრულებელი რიჩარდ ჰარისი გარდაიცვალა.

ჰარი პოტერის მსახიობები გემბონის დაღუპვას გამოეხმაურნენ. მთავარი გმირის, ჰარი პოტერის, როლის შემსრულებელმა, დენიელ რედკლიფმა გემბონთან მუშაობის გამოცდილება გაიხსენა და მას ერთ-ერთი ყველაზე მხიარული ადამიანი უწოდა, რომელთან ერთადაც ვერასოდეს მოიწყენდი.

"მაიკლ გემბონი ერთ-ერთი ყველაზე გასაოცარი მსახიობი იყო მათ შორის, ვისთან მუშაობის პრივილეგიაც მქონია. ამ საოცარი ნიჭის გარდა, ყველაზე კარგად, რაც მასზე დამამახსოვრდება, ისაა, რამდენად დიდ სიამოვნებას ანიჭებდა თავისი საქმე. ძალიან იღბლიანი ვარ, რომ მასთან მუშაობის ბედნიერება მქონდა", — ამბობს რედკლიფი.

მსახიობმა რუპერტ გრინტმა, რომელიც ფილმებში რონის როლს ირგებს, გემბონს მისი მისაბაძი მაგალითი უწოდა.

"ძალიან ვწუხვარ მაიკლის ამბის გამო. მას გადასაღებ მოედანზე ყოველდღიურად უდიდესი სითბო და მხიარულება შემოჰქონდა და ბავშვობიდანვე აღმაფრთოვანებდა. ის ჩემთვის მისაბაძ მაგალითად იქცა იმისთვის, რომ ცხოვრებაში რაღაც დადებითი ყოველთვის მომეძებნა. მის ოჯახს მთელ ჩემს სიყვარულს ვუგზავნი", — წერს მსახიობი.

სოციალურ ქსელში მსახიობის გარდაცვალებას გამოეხმაურა ჰერმიონ გრეინჯერის როლის შემსრულებელი ემა უოთსონიც.

"კეთილო, კეთილო, კეთილო მაიკლ გემბონ. საქმეს ზედმეტად სერიოზულად არასოდეს უდგებოდი, თუმცა მაინც ყოველთვის ახერხებდი, ყველაზე მნიშვნელოვანი სცენები საოცრად გაგეცოცხლებინა. მადლობა, რომ გვიჩვენე, როგორია იყო დიდებული. ძალიან მოგვენატრები", — წერს უოთსონი.

ფოტო: Emma Watson / Instagram

გემბონის გარდაცვალების გამო მწუხარება ჯეისონ ისააკსმა (ჰარი პოტერში ლუციუს მალფოი), ჯეიმს ფელპსმა (ფრედ უისლი), ჰარი პოტერის წიგნების ავტორმა ჯოან როულინგმა და სხვებმაც გამოთქვეს.

ჰარი პოტერის გარდა, გემბონმა გამორჩეული როლები შეასრულა ასევე სერიალებში The Singing Detective და Maigret. მისი საეკრანო დებიუტი ჯერ კიდევ 1965 წელს შედგა, როცა ფილმში ოტელო ლორენს ოლივიესთან ერთად ითამაშა. გემბონი ასევე გახლდათ ოლივიეს დაფუძნებული ეროვნული სამეფო თეატრის ერთ-ერთი პირველი მსახიობი.

ხანგრძლივი კარიერის განმავლობაში, რომელმაც ექვსი ათწლეული მოიცვა, მაიკლ გემბონმა არაერთი პრესტიჟული პრიზიც დაიმსახურა. მსახიობი ლორენს ოლივიეს პრემიის სამგზის და ბრიტანული კინოაკადემიის დაჯილდოების (BAFTA) ოთხგზის ლაურეატია. სამსახიობო სფეროში შეტანილი განსაკუთრებული წვლილისთვის დედოფალმა ელიზაბეთ II-მ გემბონი 1998 წელს რაინდის წოდებითაც დააჯილდოვა.