ჩინელი ტიკტოკერი და ინფლუენსერი მას შემდეგ გარდაიცვალა, რაც პირდაპირ ეთერში რამდენიმე ბოთლი ძლიერი ალკოჰოლური სასმელი დალია. ინფლუენსერი, სახელად Sanqiange, პირდაპირ ეთერში გასვლიდან მალევე გარდაცვლილი იპოვეს. მან ჩინური ალკოჰოლური სასმელი, სახელად ბაიჯიუ, დიდი რაოდენობით დალია, რაც ტიკტოკის ერთ-ერთი თამაშის წესებში შედიოდა.

გარდაცვლილის მეგობარმა პოლიციას განუცხადა, რომ ინფლუენსერი თამაშში იღებდა მონაწილეობას და დიდი რაოდენობით ალკოჰოლური სასმელი სწორედ ამიტომ დალია. თამაშის წესების მიხედვით, გამარჯვებულს მაყურებლები საჩუქარს გადასცემენ, ხოლო დამარცხებული ვალდებულია ალკოჰოლური სასმელი პირდაპირ ეთერში დალიოს.

"არ ვიცი, რამდენი დალია სანამ ლაივის ყურებას დავიწყებდი, მაგრამ დავინახე, რომ სამი ბოთლის დალევა დაასრულა და მეოთხეს იწყებდა. ტიკტოკის თამაში დაახლოებით ღამის პირველ საათზე დასრულდა, ოჯახმა კი ის დილით იპოვა", — ამბობს გარდაცვლილი ინფლუენსერის მეგობარი.

ვიდეო, რომელიც ინფლუენსერმა სიკვდილამდე ჩაწერა, სოციალური ქსელებიდან გამქრალია. აღსანიშნავია, რომ ჩინელი ინფლუენსერები სხვადასხვა პროდუქტის გადასაყიდად სოციალურ ქსელებს ხშირად იყენებენ და თამაშებში ერთმანეთსაც ეჯიბრებიან. ტიკტოკერის გარდაცვალების შემდეგ კი დებატები ამ სფეროს რეგულაციის შესახებ ისეც განახლდა.