90 წლის კუ, რომელიც ჰიუსტონის ზოოპარკის უხუცესი ცხოველია, ახლახან მამა გახდა. კუ მადაგასკარში დაიბადა, 36 წლის წინ კი ტეხასის ჰიუსტონის ზოოპარკში გადაიყვანეს, სადაც თავის მომავალ პარტნიორს შეხვდა.

უკვე 27 წელია, კუ თავის პარტნიორთან ერთად ცხოვრობს, თუმცა აქამდე შვილები არ ჰყოლიათ. რამდენიმე დღის წინ ზოოპარკის თანამშრომელმა კუების საცხოვრებელში კვერცხები შენიშნა და მიხვდა, რომ მალე ზოოპარკს ახალი წევრები შეემატებოდნენ.

კუს კვერცხები უსაფრთხო გარემოში გადაიტანეს და მათგან სამი პატარა კუ გამოიჩეკა. პატარა კუები ჯერჯერობით ვეტერინარების დაკვირვების ქვეშ არიან, გარკვეული პერიოდის შემდეგ კი მათთვის უსაფრთხო იქნება, რომ მშობლებთან ერთად იცხოვრონ.

ფოტო: HOUSTON ZOO

"90 წლის კუ ჩვენი უხუცესი ცხოველია და ახლა ის ჩვენი ზოოპარკის უხუცესი მამაც გახდა", — განაცხადა ზოოპარკის თანამშრომელმა. მისი თქმით, სამი პატარა კუს დაბადება სასწაულს ჰგავს და ასეთი რამ ძალიან იშვიათად ხდება.

აღსანიშნავია, რომ ჰიუსტონის ზოოპარკის მკვიდრი 90 წლის კუ მსოფლიოს უხუცესი კუ არ არის. გინესის მსოფლიო რეკორდების მიხედვით, მსოფლიოს უხუცესი კუ ჯონათანია, რომელსაც ცოტა ხნის წინ 190 წელი შეუსრულდა.