რამდენიმე დღის წინ ფლორიდელ კაცს დაუპატიჟებელი, თუმცა ზრდილობიანი სტუმარი ეწვია. ალიგატორმა კაცს კარზე დაუკაკუნა, გაღების შემდეგ კი ფეხზე მსუბუქად უკბინა.

როგორც 56 წლის კაცი იხსენებს, საღამოს ტელევიზორს უყურებდა, როცა კარზე დაუკაკუნეს. "მაშინვე კართან მივედი, გამოვაღე და როცა შუქის ანთებას ვცდილობდი, ალიგატორი ფეხზე მომეჭიდა და კანკალი დაიწყო", — იხსენებს დაშავებული. როგორც მოგვიანებით გაირკვა, დაუპატიჟებელი სტუმარი ალიგატორი აღმოჩნდა, რომელმაც კაცს ფეხზე უკბინა. კაცი საავადმყოფოში მალევე გადაიყვანეს და მის სიცოცხლეს საფრთხე არ ემუქრება.

ფოტო: CNN

"ვეჭვობ, ალიგატორს ისევე გაუკვირდა ჩემი დანახვა, როგორც მე — მისი", — დასძინა დაშავებულმა. ფლორის ველური ბუნების დაცვის კომისიის განცხადებით, ისინი ადამიანებს ხშირად აფრთხილებენ, რომ ალიგატორებისგან დისტანცია დაიჭირონ, ასევე მოარიდონ მათ შინაური ცხოველები და ქვეწარმავლებს არც საკვები შესთავაზონ. კომისიის განცხადებით, დათბობასთან ერთად შტატში ალიგატორები ადგილობრივების უფრო ხშირი სტუმრები გახდნენ, განსაკუთრებით შებინდებისას და გამთენიისას.

ალიგატორს, რომელმაც 56 წლის კაცი კარზე კაკუნით გარეთ გამოიტყუა, მახე დაუგეს და საცხოვრებელი ტერიტორიიდან ამ გზით გაიყვანეს. ველური გარემოს დაცვის კომისიის ცნობით, ამ ეტაპზე ფლორიდაში დაახლოებით 1,3 მილიონი ალიგატორი ცხოვრობს.