საქართველოს გასტრონომიის ასოციაციის ინიციატივით, 27 თებერვალი ხაჭაპურის ეროვნულ დღედ გამოცხადდა. როგორც საქართველოს გასტრონომიის ასოციაციის ვებგვერდზე ვკითხულობთ, პირველი არტიზანული სახაჭაპურის — გუნდას დაფინანსებითა და თანამშრომლობით ასოციაციამ 2018-2020 წლებში ხაჭაპურის წარმოშობის ისტორიისა და მისი ნაირსახეობების შესახებ კვლევა მოამზადა.

"ხაჭაპურს, ქართველებისთვის ცალსახად ეროვნულ სიამაყეს, ყველა სხვა ცომიან გამომცხვარ კერძზე მეტი ღირებულება აქვს, გემოვნური თვისებებითა თუ იმ ისტორიითა და მრავალფეროვნებით, რომლითაც საქართველოს საუკეთესოდ წარმოაჩენს. საგულისხმოა, რომ მისი არცთუ მცირე სახეობა არსებობს და ყველა კუთხეს თავისებური ვერსია აქვს", — ვკითხულობთ საქართველოს გასტრონომიის ასოციაციის ვებგვერდზე.

კვლევის შედეგად დადგინდა, რომ საქართველოში 47 სახეობის ხაჭაპურის არსებობს. თითოეული მათგანი განსხვავებული მომზადების წესით გამოირჩევა, რომელიც კონკრეტული კუთხის ადათს უკავშირდება. კვლევის მიხედვით, საქართველოში ყველაზე მეტად გავრცელებული იმერული, ე.წ. კეცის ხაჭაპურია, თუმცა სხვადასხვა კუთხეს გულსართიანების მომზადების თავისებური კულინარიული ხერხები აქვს და ცნობილია აჭარული, გურული, მეგრული, სვანური, რაჭული, კახური, თუშური, ოსური და სხვა ხაჭაპური.

შეგახსენებთ, რომ ხაჭაპურის ქართული წარმოშობის დასადასტურებლად ჩატარებული კვლევის საფუძველზე 2019 წლის 22 იანვარს არამატერიალური კულტურული მემკვიდრეობის ელემენტს — "ხაჭაპურის ტრადიცია საქართველოში" — არამატერიალური კულტურული მემკვიდრეობის ძეგლის სტატუსი მიენიჭა.