დიდი ბრიტანეთისა და ჩრდილოეთ ირლანდიის გაერთიანებული სამეფოს არჩევნებში კონსერვატიულმა პარტიამ უმრავლესობა დაკარგა.

წინასწარი შედეგებით, კონსერვატორებმა ხმების 42 პროცენტი მიიღეს, ლეიბორისტებმა - 40 პროცენტი, ლიბერალ დემოკრატებმა - 7 პროცენტი, ხოლო UKIP-მა და მწვანეებმა 2-2 პროცენტი. ეს შედეგები იმას ნიშნავს, რომ ვესტმინსტერში 650 დეპუტატიდან კონსერვატორებს 316 (-12) დეპუტატი ეყოლებათ, ლეიბორისტებს კი - 261 (+29). უმრავლესობის მისაღებად პარტიას 326 ადგილი სჭირდება.

ლეიბორისტების ლიდერი, ჯერემი კორბინი მეის გადადგომისკენ მოუწოდებს. პრემიერის განცხადებით, ის და მისი პარტია აპირებენ, უზრუნველყონ სტაბილურობა გაერთიანებულ სამეფოში, თუმცა როგორც BBC-ის პოლიტიკის მიმართულების რედაქტორი, ლორა კუინსბერგი ამბობს, მეი გადადგომას არ აპირებს.

BBC-ის ცნობით, ტერეზა მეიმ ვადამდელი არჩევნები იმის გამო დანიშნა, რომ ბრექსიტის მოლაპარაკებების დაწყებამდე უფრო დიდი უმრავლესობის მოპოვება სურდა.

ჯერემი კორბინის თქმით, "თუ დღევანდელ შედეგებში რაიმე მესიჯი დევს, ეს არის ის, რომ პრემიერ-მინისტრმა არჩევნები დანიშნა, რადგან სურდა მანდატის მიღება. მანდატი, რომელიც მან მიიღო, არის დაკარგული ადგილები, დაკარგული ხმები, დაკარგული მხარდაჭერა და დაკარგული თავდაჯერებულობა. მე ვფიქრობ, ეს საკმარისია წასასვლელად და გზის დასათმობად მთავრობისთვის, რომელიც ამ ქვეყნის მოქალაქეების ნამდვილი წარმომადგენელი იქნება."

საბოლოო შედეგები, სავარაუდოდ, პარასკევს, ბრიტანეთის დროით შუადღეს გახდება ცნობილი.