NDI საზოგადოების აზრის კვლევის ახალ შედეგებს აქვეყნებს. ანგარიში რუსეთის უკრაინაში შეჭრამდე დაახლოებით ორი კვირით ადრე (3-15 თებერვალი) და ორი კვირის შემდეგ (9-20 მარტი) არის ჩატარებული.

რატომ არის მნიშნველოვანი: ახალ კვლევაში ინსტიტუტებისა და პოლიტიკური პარტიების მიმართ ნდობის შემცირების ტენდენცია გამოიკვეთა. კერძოდ, მთავრობის საქმიანობის შეფასება უცვლელია — გამოკითხულთა ნახევარი ცუდად აფასებს.

  • გაიზარდა პრეზიდენტის საქმიანობის ნეგატიური შეფასების მაჩვენებელიც.
  • უმრავლესობა კი კვლავ ფიქრობს, რომ პარლამენტი მოსახლეობის საჭიროებებს არ პასუხობს.
  • ასევე, უმრავლესობის აზრით, პოლიტიკოსები და რუსეთი ქართულ საზოგადოებას ხლეჩს.
მთავრობის შეფასების მაჩვენებელი წლებისა და თვეების მიხედვით

მთავრობის შეფასების მაჩვენებელი წლებისა და თვეების მიხედვით

ფოტო: NDI

დეტალები: მოსახლეობის უმრავლესობა მიიჩნევს, რომ ქვეყნის ინტერესებიდან გამომდინარე არც მმართველი პარტია და არც არჩეული ოპოზიციური პარტიები მოქმედებენ.

  • კერძოდ: 59% არ ეთანხმება მოსაზრებას, რომ ქართული ოცნება მოქმედებს ქვეყნის ინტერესებიდან გამომდინარე, 67% კი არ იზიარებს იმ აზრს, რომ პარლამენტში ან ადგილობრივ თვითმართველობაში არჩეული ოპოზიციური პარტიები იქცევიან ასე.
  • გარდა ამისა, ოპოზიციური პარტიების მხარდამჭერთა უმეტესობა მიიჩნევს, რომ ოპოზიცია მათი ინტერესებიდან გამომდინარე არ მოქმედებს.

ხვალ რომ არჩევნები ტარდებოდეს: კვლევის მიხედვით, გამოკითხულთა უმრავლესობა წავიდოდა არჩევნებზე — კერძოდ, 66%.

  • არჩევნებზე წასვლაზე უარს ყველაზე ხშირად ეთნიკური უმცირესობების დასახლებაში მცხოვრები, ასევე გადაუწყვეტელი ამომრჩეველი ამბობდა.
  • ახალგაზრდების 65% ამბობს, რომ მათ ინტერესს არცერთი პოლიტიკური პარტია არ წარმოადგენს.

მეთოდოლოგია: კვლევა ჩატარებულია NDI-ის დაკვეთით CRRC საქართველოს მიერ, დიდი ბრიტანეთის მთავრობის UK aid-ის ფინანსური ხელშეწყობით.

  • აღნიშნული ანგარიში 14 ივლისიდან-15 აგვისტომდე ქვეყნის მასშტაბით ჩატარებულ, საქართველოს ზრდასრული მოსახლეობის წარმომადგენლობით პირისპირ გამოკითხვის შედეგებს ემყარება (ოკუპირებული ტერიტორიების გამოკლებით).
  • აგვისტოში ჩატარებული გამოკითხვა სულ 2 104 დასრულებულ ინტერვიუს მოიცავს;
  • საშუალო ცდომილების ზღვარი კვლევაში +/- 2 პროცენტია.