სუს-ის ყოფილი უფროსის მოადგილე წერს, რომ უსმენდნენ ყველას — მომხრეებს, მოწინააღმდეგეებს, ასევე, არა მარტო ე.წ მთავარ ობიექტებს, არამედ მათ ოჯახის წევრებსა და გარემოცვას.

რატომ არის მნიშვნელოვანი: გოგაშვილი დეტალურად აღწერს ოპერატიული ტექნიკური დეპარტამენტის (ოტო) მუშაობის მექანიზმს და იმას თუ როგორ ხვდებოდა კრებსები ივანიშვილისა და მმართველი პარტიის სხვა წევრების ხელში.

  • ამბობს, რომ ოტო ე.წ VIP პერსონების საუბრებს ივანიშვილს უგროვებდა და ყოველდღიურად აწვდიდა.
  • წერს, რომ მის პერიოდში ოტოდან კრებსებს ბექა მამარდაშვილი უგზავნიდა, მათ სპეციალურ ჯგუფს ამუშავებინებდა და ყოველ მეორე დღეს თანამშრომელს პარტიაში, ასევე, ივანიშვილთან, კობახიძესთან და პრემიერმინისტრთან ატანდა, გომელაური კი სრულ "პატაკს" იღებდა.
  • "ივანიშვილი, ინფორმაციის გაცნობის შემდეგ, საჭიროების შემთხვევაში გვაძლევდა მითითებებს (სუს-სა და პარტიას), რომელი ობიექტისთვის რა უნდა გაგვეკეთებინა".

დეტალები: გოგაშვილი ამბობს, რომ ივანიშვილი მოსმენებისთვის სუს-თან ერთად, იყენებს შსს-ს, თავდაცვის სამინისტროს, კრიმინალურ პოლიციას, დაზვერვასა და პროკურატურას.

  • მისი თქმით, მოსმენებს ახორციელებს დაახლოებით 2000 ოპერატიული მუშაკია ჩართული და ერთდროულად 100 ათასი ადამიანის მოსმენაა შესაძლებელი.
  • წერს, რომ ოტოს პერიოდულად პერსონალურ მონაცემთა დაცვის ინსპექტორი ამოწმებს, თუმცა ეს ფიქტიურია, რადგან ინსპექტორი წინასწარ უკავშირდება სუს-ის უფროსს და შემოწმების შესახებ აფრთხილებს.
  • სუს-ის უფროსი კი, თავის მხრივ, ოტოს უფროსს აფრთხილებს, გეგმიური შემოწმების დროს კი უკანონო მოსმენები ჩერდება და მხოლოდ განჩინებით "შემოწმება" გრძელდება.

ამასთან, გოგაშვილის თქმით, გარდა GSM-ის ქსელებისა, ოტო ვირუსების საშუალებით, უკანონოდ უსმენს სხვადასხვა აპლიკაციას, კომპიუტერს, ლეპტოპს, ასევე, შესაძლებელია, ოფისების უკანონო აღჭურვა.

  • მისი თქმით, კონტროლდება პრეზიდენტის, ოპოზიციური პარტიების, NGO-ების, საერთაშორისო მისიების, რელიგიური კონფესიებისა და ა.შ. ოფისები.
  • ასევე, წერს, რომ ოცნების მმართველობის პერიოდში უკანონო მოსმენების მასშტაბმა რამდენჯერმე გადააჭარბა ენმ-ის პერიოდს.

ირაკლი კობახიძე გოგაშვილის განცხადებას აბსურდულს უწოდებს და ამბობს, რომ ბექა მამარდაშვილს საერთოდ არ იცნობს.

  • "როგორ შეიძლება, პარტიის ოფისში ბექა მამარდაშვილს მოჰქონდეს კრებსები და მე არ ვიცნობდე ამ კაცს? სრული აბსურდია. რომ მაჩვენო, სახეზე არ ვიცი".

კონტექსტი: 2021 წლის 13 სექტემბერს ერთ-ერთი ღია წყაროზე აიტვირთა სასულიერო პირებთან, ჟურნალისტებთან აქტივისტებთან, დიპლომატებთან და სხვა პირებთან დაკავშირებით მასალები, რომელმაც სავარაუდოდ, სახელმწიფო უსაფრთხოების სამსახურიდან გაჟონა.

  • ე.წ. კრებსები, დაახლოებით, 58 000-მდე ფაილს მოიცავდა, რომელშიც შედის პირადი ცხოვრების შესახებ დეტალურად დამუშავებული ინფორმაცია;
  • ოფიციალურად მისი ავთენტურობა დადასტურებული არ არის, თუმცა საკუთარი თავი არაერთმა ადამიანმა ამოიცნო.