ცნობილი ამერიკელი მსახიობის არმი ჰამერისა და მისი ოჯახის შესახებ დოკუმენტური ფილმი გადაიღეს. ნამუშევარში, სახელწოდებით House of Hammer, მოთხრობილია არა მხოლოდ მსახიობის ბოლოდროინდელი სკანდალები, არამედ მისი ოჯახის სხვა წევრების გასაიდუმლოებული ამბებიც.

ჰამერი, რომელიც რამდენიმე წლის წინ ჰოლივუდის ამომავალ ვარსკვლავადაც მიიჩნეოდა, მალევე გახდა კრიტიკის ობიექტი და საყოველთაო აღშფოთების მიზეზი. საქმე ისაა, რომ გასული წლის დასაწყისში გავრცელდა "სქრინშოთები", სადაც იგი აღნიშნავდა, რომ "100%-ით კანიბალია". მსახიობი ასევე საუბრობდა ისეთ თემებზე, როგორიცაა კანიბალიზმი, სისხლის დალევა, უხეში სექსისა და გაუპატიურების ფანტაზიები. მისი კანიბალისტური მიდრეკილება გაიხსენეს ყოფილმა პარტნიორებმაც, თუმცა, თავად ჰამერმა ყველაფერი უარყო.

House of Hammer-ის დიდი ნაწილი სწორედ ამ ბრალდებების განხილვას დაეთმობა. დოკუმენტური ფილმის ტრეილერი ცოტა ხნის წინ გავრცელდა და მასში გაჟღერებულმა ინფორმაციამ უკვე გამოიწვია მწვავე ინტერნეტგანხილვები.

"არმი ჰამერის ბრალდებები მხოლოდ აისბერგის წვერია", — წერს ფილმის გამომშვები კომპანია Discovery+, — "საარქივო მასალებისა და გადარჩენილების თუ ოჯახის წევრების ინტერვიუების მეშვეობით ჰამერების ოჯახის შავ-ბნელი საიდუმლოებები გამოაშკარავდება".

გაფრთხილება: ვიდეო შეიცავს გაუპატიურებისა და სექსუალური ძალადობის გრაფიკულ აღწერას.

ტრეილერში რამდენიმე ცნობილი ადამიანიც გამოჩნდა, რომლებმაც არმი ჰამერი დაადანაშაულეს. ერთ-ერთი მათგანი მხატვარი ჯულია მორისონია. მორისონმა გაასაჯაროვა ჰამერის მისთვის მიწერილი წერილი ინსტაგრამზე. მსახიობი მას ღიად უზიარებს გაუპატიურებაზე ფანტაზიას.

ჯულიას თქმით, მესიჯის მნიშვნელობას ბოლომდე დღესაც ვერ ხვდება, თუმცა, ჰამერის განზრახვები კიდევ უფრო ცხადი მაშინ გახდა, როცა მისგან ხმოვანი შეტყობინება მიიღო. ჩანაწერში ისმის, როგორ საუბრობს, სავარაუდოდ, მსახიობი, უხეში სექსის სურვილზე მხატვართან.

კიდევ ერთი ქალი, რომელიც დოკუმენტური ფილმის ტრეილერში ჩნდება და არმი ჰამერს ადანაშაულებს, კორტნი ვუჩეკოვიჩია. მსახიობმა მას ფოტოც კი გაუგზავნა ნივთისა, რომლის გამოყენებაც სექსუალური კავშირის დასამყარებლად სურდა.

სრული ისტორიების გაგებას და ფილმის ნახვას მაყურებელი შემოდგომაზე შეძლებს; House of Hammer 2 სექტემბერს გამოვა.