ნინი გოგაშვილი ამბობს, რომ მისი სახლიდან პირადი ლეპტოპი და Wi-Fi-ს როუტერი მიაქვთ.

რატომ არის მნიშვნელოვანი: გუშინ ღამით სახელმწიფო უსაფრთხოების სამსახურის ხელმძღვანელის ყოფილი მოადგილე, სოსო გოგაშვილი დააკავეს.

  • 15 ივლისს გოგაშვილმა ფეისბუქპოსტი გამოაქვეყნა, სადაც 2021 წლის თვითმმართველობის არჩევნების გაყალბების ფაქტებზე საუბრობდა.
  • გოგაშვილი მიუთითებდა, რომ 2021 წლის შემოდგომაზე მედიასაშუალებებმა არჩევნების გაყალბების ფაქტები ნაწილობრივ გააშუქეს.
  • მისი თქმით, 13 ივლისს, გია გაჩეჩილაძის მიერ გავრცელებული ჟურნალისტებზე სავარაუდო უკანონო მიყურადების შედეგად მოპოვებული ჩანაწერის ნაწილი ერთ-ერთი სიუჟეტის მომზადების პროცესს ასახავდა.

დეტალები: გოგაშვილის შვილი ამბობს, რომ მის სახლში მისული 10 ადამიანი იყო, მათგან 2 სახლს ამოწმებდა, 1 თავად მას ელაპარაკებოდა, ხოლო დანარჩენები სადარაზოში იდგნენ.

  • "არ ვიცით, რის საფუძველზეა ეს შემოწმება, მარტო ის ვიცი, სოსო გოგაშვილის შვილი რომ ვარ, იმიტომ მიაქვთ ჩემი ლეპტოპი, სხვა პასუხი ვერ მივიღე.
  • "ვერ ვხვდები ჩემი ლეპტოპი რატომ მიაქვთ, იმიტომ, რომ არ ვცხოვრობ ჩემს ოჯახის წევრებთან ერთად, დამოუკიდებელი ადამიანი ვარ, სრულწლოვანი, ცალკე ვცხოვრობ და მაინც მიაქვთ ლეპტოპი, მაგრამ ნუ, ასე გადაწყდა".
  • გოგაშვილის შვილი ამბობს იმასაც, რომ მასთან ოჯახის წევრებს ისევ არ უშვებენ და ამ დრომდე არ უნახავს დედა, მამა, ძმები და ძმის შვილი.
  • ნინი გოგაშვილის ძმის, ნიკა გოგაშვილის განცხადებით, თითქმის ყველა გაჩხრიკეს, ვისაც სოსო გოგაშვილთან შეხება ჰქონდა.
  • "გადაატრიალეს სახლები, მამაჩემის პირადი მძღოლი ვინც არის იმის სახლშიც მივიდნენ, ამოუყირავეს სახლი".

გარდა ამისა, კითხვაზე, შეიძლება თუ არა გოგაშვილის დაკავება მის ფეისბუქპოსტს უკავშირდებოდეს, ნიკა გოგაშვილი ამბობს, რომ არ გამორიცხავს.

  • "არ არის გამორიცხული, იმიტომ, რომ იმ ღამესვე შემოვარდნენ, გეგონება ტერორისტები ვიყოთ".
  • მისი თქმით, დიპლომატებს აქვთ ყველა ის მასალა, რის გასაჯაროებასაც სოსო გოგაშვილი აანონსებდა.

გოგაშვილის ცოლის განცხადებით, სამართალდამცავები სახლში ღამის ორ საათზე შევარდნენ. ამბობს, რომ დაინახა, თუ როგორ დადეს იარაღი ლეიბის ქვეშ.

  • მისივე თქმით, გოგაშვილს დაკავების დროს ბეჭში წიხლი დაარტყეს, გარდა ამისა, გასიებული აქვს მარჯვენა ლოყა.
  • გოგაშვილის ცოლი ამბობს იმასაც, რომ გამოძიება სამი, მათ შორის, 236-ე და 157-ე მუხლის მე-4 ნაწილით მიმდინარეობს.