მასწავლებელმა, ლადო აფხაზავამ უკრაინელების დასახმარებლად 700 ათასი ლარი შეაგროვა. 4 მარტს მან ფეისბუქგვერდზე დაწერა, რომ უკრაინელი მოსწავლეებისა და მასწავლებლების დასახმარებლად დედის დატოვებულ ბეჭედსა და იმ ოქროს მონეტას ყიდის, რომელიც მას მასწავლებლის გლობალურ ჯილდოზე გადასცეს.

"უკრაინელი მოსწავლეებისა და მასწავლებლების დასახმარებლად გადავწყვიტე გავყიდო დედის მიერ დატოვებული ოქროს რგოლის ბეჭედი და ჩემი ჯილდოს მონეტა. ალბათ, 2500 ლარი საკმარისია. დედა, ეს შენც გაგიხარდებოდა. მაპატიე, მაგრამ ახლა მეტი არაფერი გამაჩნია. დიდება უკრაინას", — წერდა ის.

ლადო აფხაზავა On.ge-სთან ამბობს, რომ თანხის შეგროვების გადაწყვეტილება მაშინ მიიღო, როდესაც ნახა ფოტო, სადაც ასახული იყო, რომ მასწავლებელი მოსწავლეებს გაკვეთილს თავშესაფარში უტარებდა. მისივე თქმით, სტატუსის დაწერის შემდეგ მასწავლებლებმა 39 ქვეყნიდან უკრაინელების დასახმარებლად თანხების შეგროვება დაიწყეს.

"ისე მოხდა, რომ აიტაცეს ჩემი სტატუსი და შემდეგ უკვე, როგორც მერე გახდა ცნობილი, 39 ქვეყნის მასწავლებლებმა შეაგროვეს თანხა და ზუსტად იმ ანგარიშზე ჩარიცხეს, რომელიც ჩვენ მივუთითეთ. ორი თვის წინ როდესაც გადავამოწმეთ, დაფიქსირდა 700 ათასი. ძალიან გვიხარია, რომ პატარა აქტივობით ამდენი თანხის შეგროვება მოვახერხეთ", — ამბობს ის.