ავღანეთის ტელეარხების ჟურნალისტი ქალები და რეპორტიორები დღეიდან ეთერში დაფარული სახით უნდა გამოჩნდნენ. მართალია, ამ ცვლილებას ტელეწამყვანი ქალების დიდმა ნაწილმა წინააღმდეგობა გაუწია, თუმცა დამსაქმებლებმა ახალი კანონის წინააღმდეგ წასვლა ვერ შეძლეს.

ავღანელი ქალები დაფარული სახით აცხადებენ ახალ ამბებს ისეთ პოპულარულ არხებზე, როგორებიცაა TOLOnews, Ariana Television, Shamshad TV და 1TV.

"არა უშავს, ჩვენ მუსლიმები ვართ და ჰიჯაბს ისედაც ვატარებდით. მაგრამ ტელეწამყვან ქალებს დაფარულის სახით 3-4 საათი ზედიზედ საუბარი ძალიან გვიჭირს", — განაცხადა TOLOnews-ის ერთ-ერთმა ტელეწამყვანმა.

ავღანელმა ტელეწამყვანმა საერთაშორისო საზოგადოების მოსთხოვა, რომ თალიბანზე ზეწოლა მოახდინონ და ახალი კანონმდებლობის გაუქმება მოსთხოვონ. "მათ სურთ, რომ ქალები სოციალური და პოლიტიკური ცხოვრებიდან ამოშალონ", — დასძინა ტელეწამყვანმა.

ფოტო: BBC

თავდაპირველად ავღანელმა ქალმა ტელეწამყვანებმა სახის დაფარვაზე უარი განაცხადეს, თუმცა თალიბანის მთავრობის განცხადებით, ამ შემთხვევაში ტელეარხების ხელმძღვანელობა დაჯარიმდება. ხოლო თუ ქალები ახალ წესს არ დაემორჩილებიან, მაშინ ისეთ სამუშაოზე უნდა გადაიყვანონ, რომლის შესასრულებლადაც მათი პირდაპირ ეთერში გამოჩენა საჭირო არ იქნება.

ტელევიზიის წარმომადგენლების გაცხადებით, ბევრი ჟურნალისტი ქალი შიშობს, რომ მალე საეთერო სივრცეს საერთოდ დაატოვებინებენ. მსოფლიო მუსლიმების უმეტესობა კი არ თვლის, რომ საჯარო სივრცეში ქალისთვის სახის დაფარვა მათი რელიგიის აუცილებელი ნაწილია. თუმცა თალიბანი მმართველობის ხელში ჩაგდების შემდეგ ქალების მიმართ კანონებს უფრო და უფრო ამკაცრებს.

ავღანეთში ბოლო კვირების განმავლობაში ქალების თავისუფლება მნიშვნელოვნად შეიზღუდა. ავღანელ ქალებს მხოლოდ კონკრეტულ დღეებში აქვთ საჯარო სკვერების მონახულების უფლება, ხოლო გრძელ გზაზე მეურვე კაცის გარეშე გადაადგილება ეკრძალებათ.