2017 წლის 21 აპრილს თბილისში თურქეთის მოქალაქე და ბიზნესმენი სინან სარაჩი, სავარაუდოდ, იმის გამო დააკავეს, რომ ქართულ მხარეს თურქეთის ხელისუფლებამ მისი გადაცემა მოსთხოვა. ამის შესახებ On.ge-ს დაკავებულის ადვოკატმა, მერაბ მამალაძემ, განუცხადა.

მამალაძის თქმით, დაკავებულს თბილისის საქალაქო სასამართლომ წინასწარი პატიმრობა შეუფარდა. გადაწყვეტილების გასაჩივრების შემდეგ, ბიზნესმენი პატიმრობაში დატოვა სააპელაციო სასამართლომაც.

დაკავებულის ადვოკატი ჩვენთან საუბრისას აცხადებს, რომ თურქული მხარე სინან სარაჩს ფეტულა გიულენთან კავშირში ადანაშაულებს. გიულენი ამერიკაში იმყოფება და თურქეთი ივლისიდან ითხოვს მის გადაცემას. პრეზიდენტი რეჯეპ ტაიპ ერდოღანი მას გადატრიალების მცდელობის ორგანიზებასა და ტერორისტული დაჯგუფების ხელმძღვანელობაში ადანაშაულებს.

მამალაძის თქმით, სინან სარაჩს ბრალად ედება, შეიარაღებულ დაჯგუფებასთან კავშირში მყოფი პირების საგანმანათლებლო მხარდაჭერა. ადვოკატი აცხადებს, რომ თურქეთისთვის გადაცემის შემთხვევაში მას საფრთხე ემუქრება და არაადამიანური მოპყრობის მსხვერპლი შესაძლოა გახდეს.

როგორც მერაბ მამალაძემ გვითხრა, თურქი ბიზნესმენი თბილისში უძრავ ქონებას ფლობს და აქ ოჯახთან ერთად ცხოვრობდა. ადვოკატის თქმით, ის ინტერპოლის წითელი ცირკულარით არ იძებნება.

აღნიშნულთან დაკავშირებით საქართველოს პროკურატურა ინფორმაციას ხვალ გაავრცელებს