მეთ გალა 2022 ცოტა ხნის წინ შედგა და ბევრი გამორჩული სამოსიც ვიხილეთ, თუმცა, ალბათ ძალიან ცოტა მათგანი თუ მოვა ახლოს კეტი პერის ჩაცმულობასთან American Idol-ის ერთ-ერთ ტურში. მეგაშოუში ვარსკვლავს არც მეტი, არც ნაკლები, ქალთევზა არიელის კოსტიუმი ეცვა.

თუმცა, მომღერალმა მხოლოდ ორიგინალური კოსტიუმით როდი მიიქცია მაყურებლის ყურადღება; შოუს მსვლელობისას, როცა წამყვანს მომდევნო მონაწილე უნდა გამოეცხადებინა, დაცემის ხმა გაისმა, რასაც თავშეუკავებელი სიცილი მოჰყვა. როცა კადრმა ჟიურისკენ გადაინაცვლა, პერის ადგილზე მაგიდიდან მხოლოდ კუდი იყო ამოჩრილი. რადგან მომღერალს უკვე ფეხებიც "არ ჰქონდა", წამოდგომაში მას სიცილ-სიცილით მიეშველნენ ჟიურის სხვა წევრები და წამყვანი.

პერის კოსტიუმი ამერიკული შოუს დისნეის ყოველწლიურ ტურს ეძღვნებოდა. თუმცა, მომღერალი ინციდენტით დიდად დამწუხრებული არც მოგვიანებით ჩანდა — მეტიც, ხელში ატაცებულმა ქალთევზამ კამერის ობიექტივში იპოზიორა კიდეც.

პერის დაცემის ვიდეო ინტერნეტში, რა თქმა უნდა, ელვის სისწრაფით გავრცელდა, რასაც ვარსკვლავმაც შეუწყო ხელი — ის თავადვე განათავსა ინსტაგრამზე და პატარა ქალთევზის ერთ-ერთი სიმღერის ტექსტის მოშველიებით იხუმრა, ფარფლის მოქნევა შორს ვერ წაგიყვანსო.

სხვათა შორის, მომღერალმა ასევე ვიდეოს სახით გაგვიზიარა, რამდენად ძნელი იყო კოსტიუმის ჩაცმა. ეჭვგარეშეა, მისით გადაადგილებაც არ იქნებოდა ადვილი. ყველაფერი ეს კი გვარწმუნებს, ურსულას რომ თავი დავანებოთ, რამდენი წინააღმდეგობის გადალახვა მოუხდა პრინცესა არიელს.