"თუკი ვენეციის კომისიის მიერ იქნა სამართლებრივ ჭრილში დაწუნებული [კონსტიტუციის] რომელიმე პუნქტი ჩვენ ამაზე აუცილებად ვიტყვით უარს," - ეს განცხადება პარლამენტის იურიდიულ საკითხთა კომიტეტის თავმჯდომარის მოადგილემ, დავით მათიკაშვილმა რუსთავი 2-ის ეთერში გააკეთა.

მისივე თქმით, მსგავსი განცხადება გაკეთებული აქვს პარლამენტის თავმჯდომარეს და შესაბამისად ეს პოზიცია არახალია.

მათიკაშვილის განცხადებით, როგორც კი კონსტიტუციის პროექტის ინიცირება მოხდება, პროექტის ტექსტი გადაეგზავნება ვენეციის კომისიაში. მისივე თქმით, ვენეციის კომისიასთან ცალკეულ წევრებთან იყო საუბარი პრეზიდენტის არაპირდაპირი წესით არჩევის შესახებ და მათი მხრიდან შენიშვნა არ გაკეთებულა.

კონსტიტუციის პროექტის მიხედვით საქართველოს პრეზიდენტს დებატების გარეშე ფარული კენჭისყრით ირჩევს საარჩევნო კოლეგია.

ქვეყნის უმაღლეს კანონზე საკონსტიტუციო კომისია დაახლოებით ოთხი თვეა მუშაობს.