პარტიამ დემოკრატიული მოძრაობა – ერთიანი საქართველო საკონსტიტუციო კომისიის სამუშაო ჯგუფი პროტესტის ნიშნად დატოვა. ამის შესახებ, პარტიის წევრმა დიმიტრი ლორთქიფანიძემ დღეს ჟურნალისტებს განუცხადა და განმარტა, რომ მათი გადაწყვეტილება უკავშირდება ქართული ოცნების საკონსტიტუციო ცვლილებების პროექტს, კერძოდ, საარჩევნო სისტემის, პრეზიდენტის არჩევის, მიწის გასხვისების საკითხსა და კონსტიტუციაში ევროატლანტიკურ სტრუქტურებისკენ მისწრაფების შესახებ ჩანაწერს, რომელიც დღეს ირაკლი კობახიძემ გააჟღერა.

დიმიტრი ლორთქიფანიძის თქმით, მათთვის რიგი საკითხები მიუღებელია და აცხადებს რომ ხელისუფლებას კომპრომისზე წასვლა არ სურს. იგი ფიქრობს, რომ ევროატლანტიკური მისწრაფებებისა და ევროსტრუქტურებში ინტეგრაციის შესახებ ჩანაწერი კონსტიტუციაში არ უნდა გაკეთდეს:

"ეს არის ის თემა, რომელმაც თავის დროზე სააკაშვილის რეჟიმმაც კი ვერ გაბედა 2010 წლის კონსტიტუციის რეფორმის ფარგლებში, რომ შეეტანა მსგავსი ცვლილება. რეალურად ეს არის ის პოლიტიკურად გარდამავალი ტენდენცია, რომელიც არაფრის დიდებით არ უნდა იქნეს კონსტიტუციაში შეტანილი. ეს არ არის ის მარადიული ღირებულება რომელიც არის დროში უცვლელი".

საკონსტიტუციო კომისიის 18 აპრილის სხდომაზე, ქართულმა ოცნებამ, ირაკლი კობახიძის თავმჯდომარეობით ცვლილებების პროექტის ის ნაწილი წარადგინა, სადაც აღნიშნულია, რომ კონსტიტუციით გაიწერება ევროპულ და ევრო-ატლანტიკურ სტრუქტურებში გაწევრიანება.