უკრაინის თავდაცვის სამინისტროს ვებგვერდზე კიბერშეტევა, სავარაუდოდ, რუსული სადაზვერვო სამსახურების მიერ განხორციელდა. ამის შესახებ ინფორმაციას უკრაინული მედია უსაფრთხოების სამსახურის კიბერუსაფრთხოების დეპარტამენტის ხელმძღვანელზე ილია ვიტიუკზე დაყრდნობით ავრცელებს.

ვიტიუკის თქმით, კონკრეტულ დამნაშავეებზე საუბარი ჯერ ნაადრევია, რადგან მსგავს დანაშაულებში მათი იდენტიფიცირება საკმაოდ ხანგრძლივი პროცესია. ამასთანავე, მან აღნიშნა, რომ თავდასხმის ღირებულება მილიონ დოლარს აღემატება.

"ინდივიდუალურ ჰაკერს ან ჰაკერთა ჯგუფს არ შეუძლია ასეთი თანხის დახარჯვა, მოგვიანებით მატერიალური სარგებლის მიღების გარეშე. ასეთ თავდასხმებს ყოველთვის ახორციელებენ სახელმწიფოები მათი სპეცსამსახურების ან მათ მიერ შექმნილი ჰაკერული კრიმინალური გაერთიანებების მეშვეობით. ამიტომ, ჩვენ ნათლად ვხედავთ უცხოური სპეცსამსახურების კვალს", — აღნიშნა მან.

15 თებერვალს უკრაინის თავდაცვის სამინისტროს ვებგვერდზე კიბერშეტევა განხორციელდა.

უკრაინის სამთავრობო ვებგვერდებზე კიბერშეტევა იყო 13 იანვარსაც. საიტზე ჩანდა წარწერა, რომელიც უკრაინელებს აფრთხილებდა, რომ მათ უნდა "ეშინოდეთ და ელოდნენ უარესს". მოგვიანებით, უკრაინამ დაადასტურა, რომ სამთავრობო ვებგვერდებზე კიბერშეტევის უკან რუსეთი იდგა.