ევროპარლამენტარი მარინა კალიურანდის განცხადებით, მიესალმებიან ასოცირების შეთანხმების შესრულებისკენ გადადგმულ ნაბიჯებს, თუმცა აღნიშნავს, რომ გარკვეულ საკითხებში სიტუაცია გასაუმჯობესებელია. მისი თქმით, სასამართლოს დამოუკიდებლობა, მოწყვლადი ჯგუფებისა და უმცირესობების დისკრიმინაციის წინააღმდეგ ბრძოლა კვლავ პრობლემურია.

კალიურანტის განცხადებით, 5 ივლისის ძალადობის ორგანიზატორები და მონაწილეები კანონის შესაბამისად უნდა გასამართლდებიან.

"ჩვენ ვაღიარეთ ის ფაქტი, რომ საქართველოში ყველა ფორმის დისკრიმინაცია კანონით აკრძალულია. მიუხედავად ამისა, ლგბტ პირების მდგომარეობა კვლავ გამოწვევად რჩება, ტრაგიკული მაგალითია 2021 წლის 5 ივლისს 50-ზე მეტ ჟურნალისტსა და აქტივისტზე ძალადობა, რამაც თბილისი პრაიდის მიერ დაგეგმილი მარშის გაუქმება გამოიწვია. ჩვენ ველით, რომ ორგანიზატორები და მონაწილეები საქართველოს კანონმდებლობისა და საერთაშორისო ვალდებულებების შესაბამისად გასამართლდებიან", — ამბობს ის.

ევროპარლამენტარმა სხვა საკითხებზეც გაამახვილა ყურადღება, მოუწოდებს მთავრობას გამოიძიონ საზოგადოების წევრებისა და დიპლომატების შესაძლო მოსმენის საქმე. შეშფოთება გამოთქვა უზენაეს სასამართლოში მოსამართლეების დანიშვნის პროცესზე.

ის მზადყოფნას გამოთქვამს მიიღოს მონაწილეობა ჟან მონეს დიალოგის ფორმატში, რაც ევროპისა და საქართველოს პარლამენტს შორის დიალოგის დაწყებას და დემოკრატიული საპარლამენტო კულტურის გაუმჯობესებას გულისხმობს. ჟან მონეს დიალოგის ფორმატის შექმნა ევროკავშირმა პარტიებს 2021 წლის 31 მარტს, ფასილიტაციის დროს შესთავაზა.

კალიურანდი ასევე აღნიშნავს, რომ პოლიტიკური და მედია მხარეების პოლარიზაცია ქვეყნის დემოკრატიული განვითარებისთვის კვლავ დიდ გამოწვევად რჩება. მისი თმით, 19 აპრილს ევროპული საბჭოს პრეზიდენტის, შარლ მიშელის მიერ მიღწეული შეთანხმება, საქართველოს სთავაზობს ევროპულ გზას ძლიერი დემოკრატიისკენ.

განცხადება ევროპარლამენტარმა საქართველო-ევროკავშირის 10 თებერვლის საპარლამენტო ასოცირების კომიტეტის სხდომის შემდეგ გააკეთა.