ქართული ოცნების დეპუტატის, გიორგი ხელაშვილის განცხადებით უკრაინის მხარდამჭერი რეზოლუციის მიზანი არ არის რუსეთის, როგორც ოკუპანტის "გამომზეურება". მისი თქმით, ამ რეზოლუციის მიზანი რეგიონში დაძაბულობის შემცირებაა.

"მოგეხსენებათ, რომ რეგიონში არის დაძაბულობა და რეზოლუციის ამოცანა არის დაძაბულობის შემცირება, ეს არის და ეს. აქ მინდა გამოვეხმაურო იმ პათოსს და შეკითხვებს, რომელიც დაკავშირებულია რუსეთის ფედერაციის მოხსენიებასთან და კიდევ ერთხელ განვმარტავ. რეზოლუციის მიზანი ეს არ არის რუსეთის ფედერაციის, როგორც ჩვენი ოკუპანტის გამომზეურება, მათი დადანაშაულება ამ კონკრეტულ შემთხვევაში და ასე შემდეგ. რეზოლუციის მიზანი არის უფრო სტრატეგიული ვიდრე ეს, ესაა რეგიონში დაძაბულობის შემცირება" — თქვა ხელაშვილმა.

მისივე განმარტებით, ეს რეზოლუცია მიმართულია უკრაინის მხარდაჭერისა და საქართველოს ინტერესებისაკენ.

დღეს, პირველ თებერვალს პარლამენტში ქართული ოცნების ინიცირებულ უკრაინის მხარდამჭერ რეზოლუციაზე მსჯელობენ, სადაც რუსეთი ნახსენები არ არის. ოპოზიციის ნაწილი ამბობს, რომ რეზოლუციას მხარს დაუჭერენ, თუ ტექსტში რუსეთს ახსენებენ. უკვე მიიღო ეს რეზოლუცია საერთაშორისო ურთიერთობების კომიტეტმა, რომელმაც ხმაურის ფონზე ჩაიარა.

ფრაქცია ქართული ოცნების თავმჯდომარე, მამუკა მდინარაძე ამტკიცებს, რომ "მცდელობა არ დაუკლიათ" სხვა პარტიების მოსაზრებებიც გაეთვალისწინებინათ. ის, ასევე, ამტკიცებს, რომ რეზოლუციის მათი ვერსიის "ყველა სიტყვა, ყველა ფრაზა გამომდინარეობს საქართველოს ეროვნული ინტერესებიდან" და დაცლილია პოპულისტური თუ პროვოკაციული რიტორიკისგან.