ყაზბეგის მუნიციპალიტეტში დღეს დამოუკიდებელი საქართველოს ისტორიაში ყველაზე მძლავრი ჰიდროელექტროსადგური დარიალი ჰესი გაიხსნა.

„დარიალი ჰესის ექსპლუატაციაში შესვლით ადგილობრივ ბიუჯეტს მხოლოდ ქონების გადასახადის სახით ყოველწლიურად დაემატება 2,5 მლნ ლარი და ამავე დროს, მნიშვნელოვანია, რომ ადგილზე მუდმივად დასაქმდება 80-მდე ადგილობრივი მცხოვრები,“ - განაცხადა პირველმა ვიცე-პრემიერმა, ფინანსთა მინისტრმა დიმიტრი ქუმსიშვილმა ჰესის ოფიციალურ გახსნაზე.

პრემიერმინისტრის პრესსამსახურის ინფორმაციით, დარიალი ჰესის აშენებაში ერთობლივი ინვესტიციები განახორციელეს დარიალენერჯიში შემავალმა ქართულმა და ამერიკულმა კომპანიებმა. ჰესი EBRD-ის მნიშვნელოვანი ფინანსური მხარდაჭერით აშენდა.

ფოტო: პრემიერმინისტრის პრესსამსახური

პროექტის ჯამური საინვესტიციო მოცულობა 123 მილიონ დოლარს შეადგენს. პროექტში აგრეთვე ჩართული იყო საქართველოს ენერგეტიკის განვითარების ფონდი, რომლის წილობრივი მონაწილეობა 23%-ია.

კვირიკაშვილის თქმით, დარიალი ჰესის პროექტს აქვს კიდევ ერთი ძალიან მნიშვნელოვანი ასპექტი, - პროექტის ფარგლებში ყაზბეგის მუნიციპალიტეტში დაწყებულია 200 ჰექტრამდე ტყის გაშენება. მისი თქმით, უკვე გაკეთებულია თევზსავალი, რომ მდინარე თერგის ბიომრავალფეროვნება შენარჩუნდეს.

დარიალი ჰესის დადგმული სიმძლავრე 108 მეგავატს შეადგენს, ჰესის დაგეგმილი საშუალო წლიური გამომუშავება 510 მლნ კვტ.სთ-ია. პროექტის ფარგლებში გამოყენებულია მსოფლიოს წამყვანი კომპანიების ელექტრო-მექანიკური და მანქანა-დანადგარები. ჰესის ექსპლუატაციაში შესვლის შემდეგ, ზამთრის პერიოდში ელექტროენერგიის იმპორტი ყოველწლიურად 200 მლნ კვტ/სთ-ით შემცირდება.

ქუმსიშვილის ინფორმაციით, ჰესის მშენებლობაზე დასაქმებული იყო 420 ადამიანი.