ქართული ოცნების თავმჯდომარის, ირაკლი კობახიძის განცხადებით, შერიგების მთავარი წინაპირობა ნაციონალური მოძრაობის სამართლებრივი შეფასება. ამის შესახებ მან პალიტრანიუსის ეთერში ისაუბრა. მისი თქმით, იმისთვის, რომ დამნაშავეს შეურიგდე, მისი დანაშაული უნდა დაფიქსირდეს და დამნაშავემ აღიაროს, რომ მისი ადგილი პოლიტიკაში აღარ არის. ჟურნალისტის რეპლიკას, რომ ეს ან უშუალოდ კონკრეტული პოლიტიკოსის, ან ამომრჩევლის გადასაწყვეტია, კობახიძე პასუხობს, რომ "ასე არ არის".

"რომ არ მომხდარიყო ნიურნბერგის პროცესი, ჰიტლერი მინიმუმ 30-40%-ს აიღებდა გერმანიაში მეორე მსოფლიო ომის შემდეგ, იმიტომ, რომ იყო რაღაცა სენტიმენტები ყოფილი მმართველი ძალა როცა არის, ეს რაღაცები მუშაობდა. ჰოდა, სწორედ ამიტომ არის საჭირო პოლიტიკური სტანდარტი და სამართლებრივი შეფასება, რომ...", — თქვა მან.

ჟურნალისტის კითხვას, ნაციონალური მოძრაობისთვის ნიურნბერგის პროცესის მსგავსს ითხოვს თუ არა, კობახიძე კვლავ სამართლებრივი შეფასების აუცილებლობაზე საუბრით პასუხობს.

"არა, ჩვენ ვსაუბრობთ რაზე, რომ შევაფასოთ. გინდა ნიურნბერგის პროცესი იყოს, გინდა იმის პროცესი, არ ვიცი, ბუენოს-აირესის, მაგრამ მთავარია, რომ რაღაცა შეფასება გაკეთდეს იმისთვის, რომ ჩვენ თეორიულად დავუშვათ საუბარი შერიგებაზე, როგორც ასეთი. მაგრამ შერიგების წინაპირობა უნდა იყოს რა: დანაშაული უნდა იყოს დაფიქსირებული, აღიარებული და შემდეგ განცხადება გაკეთებული იმასთან დაკავშირებით, რომ ასეთი დანაშაულების ჩამდენ პოლიტიკოსებს აღარ გვეკუთვნის პოლიტიკაში დარჩენა. ეს არის მარტივი", — თქვა მან.

გარდა ამისა, ჟურნალისტმა კობახიძეს ჰკითხა, რატომ არ მოხდა სამართლებრივი შეფასება თავიდანვე, როცა ქართული ოცნება მოვიდა ხელისუფლებაში. კობახიძე ამბობს, რომ თავიდან ამას ხელი შეუშალა კოალიციურობამ, რადგან შეიძლება ბევრი თანახმა არ ყოფილიყო.

11 ნოემბერს პენიტენციურმა სამსახურმა გამოაქვეყნა სააკაშვილის კადრები, რომლებშიც ჩანს, რომ მიხეილ სააკაშვილი გლდანის ციხის სამკურნალო დაწესებულებაში ძალის გამოყენებით გადაჰყავთ. კადრების მიხედვით, სააკაშვილი სასწრაფო დახმარების მანქანიდან იძულებით გამოიყვანეს, ძალით შეიყვანეს შენობის დერეფნებსა და ლიფტშიც, კერძოდ, ფეხებსა და ხელებში ჩაავლეს ხელი, რა დროსაც ტანსაცმელი თითქმის გახდილი აქვს. ექსპრეზიდენტი ციხის საავადმყოფოს პალატაში უკვე წელზევით შიშველი შეიყვანეს და პირდაპირ იატაკზე დასვეს.

მისდამი ასეთ მოპყრობაზე სააკაშვილმა იმ დღესვე ისაუბრა, როცა გლდანის ციხეში გადაიყვანეს. ის აცხადებდა, რომ წინააღმდეგობის მიუხედავად, იძულებით შეიყვანეს მე-18 დაწესებულებაში, კრიმინალების გინების ქვეშ გაათრიეს მიწაზე, ჩაარტყეს კისერში, ათრიეს თმებით, რა დროსაც წინააღმდეგობა გაუწია. მისი ადვოკატი, ნიკა გვარამია კი ამბობდა, რომ პატიმრები, ე.წ. შუმოკით ფანჯრებთან სპეციალურად დაახვედრეს და სააკაშვილი აგინებინეს.

7 დეკემბერს სახელმწიფო ინსპექტორის სამსახურმა მიხეილ სააკაშვილის კადრების გავრცელების გამო, იუსტიციის სამინისტრო და პენიტენციური სამსახური დააჯარიმა და მათი წაშლა დაავალა. მათი გადაწყვეტილებით, საქართველოს იუსტიციის სამინისტროსა და სპეციალურ პენიტენციურ სამსახურს ადმინისტრაციული პასუხისმგებლობა დაეკისრათ, პერსონალურ მონაცემთა დაცვის შესახებ საქართველოს კანონის 44-ე მუხლით გათვალისწინებული ადმინისტრაციული სამართალდარღვევის რამდენიმე ეპიზოდისთვის.