ყოფილი პრეზიდენტის, მიხეილ სააკაშვილის ადვოკატები ითხოვენ, პროცესი პირდაპირ ეთერში გაშუქდეს. დიმიტრი საძაგლიშვილის განცხადებით, ამ საქმეზე ძალიან მაღალი საჯარო ინტერესია და მისი გადაღება მხოლოდ მხოლოდ საზოგადოებრივ მაუწყებელს არ უნდა შეეძლოს, ამიტომ საჭიროა პირდაპირი ტრანსლაცია.

"ისტორიული პროცესი, როგორც პირდაპირი, ასევე გადატანითი მნიშვნელობით და მიხეილ სააკაშვილს ძალიან დიდი ხნის პაუზის შემდეგ, მიეცემა შესაძლებლობა, ქართული საზოგადოების წინაშე წარსდგეს. ბუნებრივია ჩვენ მოვითხოვთ, რომ მოხდეს პირდაპირ ეთერში ტრანსლირება და მხოლოდ საზოგადოებრივ მაუწყებელს არ ჰქონდეს ვიდეოგადაღების საშუალება სასამართლო პროცესზე", — განაცხადა მან საასმართლოს ეზოში.

პენიტენციური სამსახური ადასტურებს, რომ მიხეილ სააკაშვილი დღეს თავის სასამართლო პროცესს დაესწრება. ამის შესახებ On.ge-ს უწყებაში განუცხადეს, სადაც დამატებით დეტალებზე არ საუბრობენ.

როგორც ცნობილია, გორის სამხედრო ჰოსპიტალი უკვე დატოვა სპეციალური პენიტენციური სამსახურის მანქანამ, რომელიც ტერიტორიიდან პოლიციის ესკორტით გამოვიდა. ხოლო თბილისის საქალაქო სასამართლოს ეზოში მობილიზებული არიან სამართალდამცავები, რომლებიც ჯერ არც ადვოკატებს უშვებენ შენობაში და არც მედიას.

დღეს სასამართლო 7 ნოემბრის საქმეზე იმსჯელებს. სააკაშვილის პროცესის პარალელურად ოპოზიციამ აქცია დააანონსა. იქამდე, კი თავად ექსპრეზიდენტმა მოუწოდა მხარდამჭერებს ამ დღეს შეკრებისკენ.

ამ სხდომამდე სააკაშვილს სამჯერ უთხრეს უარი საკუთარ პროცესზე დასწრებაზე, მიზეზად იუსტიციის სამინისტრო მისი ჯანმრთელობის მდგომარეობას და უსაფრთხოებას ასახელებდა. საერთაშორისო პარტნიორები, უფლებადამცველები, ომბუდსმენი, ელჩები და არასამთავრობო ორგანიზაციები აცხადებდნენ, რომ სააკაშვილს არ უნდა შეეზღუდოს საკუთარ სხდომაზე დასწრების უფლება.

22 ნოემბერს იუსტიციის მინისტრმა განაცხადა, რომ ვინაიდან ექსპრეზიდენტმა შიმშილობა შეწყვიტა, გამოირიცხა ერთი ფაქტორი, რომლის გამოც ის სასამართლოში არ მიჰყავდათ. მისივე თქმით, ექიმების შესაბამისი დასკვნის შემთხვევაში, შესაძლებელი იქნებოდა, ის შემდგომ სასამართლო პროცესზე დარბაზში მიეყვანათ.