"ალბათ, დროა, მოვიწვიოთ კონფერენცია ლეგიტიმაციის, დემოკრატიის და ხალხის არჩევანის საკითხებზე", — ასე ეხმაურება ქართული ოცნების დეპუტატი, შალვა პაპუაშვილი სახალხო დამცველის, ნინო ლომჯარიას განცხადებას, რომ მმართველი პარტიის თავმჯდომარეს, ირაკლი კობახიძეს ლეგიტიმაცია არ აქვს.

"ქართული ოცნების თავმჯდომარე, ირაკლი კობახიძეს არანაირი ლეგიტიმაცია არ აქვს, განაცხადა საქართველოს სახალხო დამცველმა. 2020 წლის საპარლამენტო არჩევნები — 928 004 მოქალაქის ხმა (48%). 2021 წლის თვითმმართველობის არჩევნები — 824 755 მოქალაქის ხმა (47%). ალბათ, დროა, მოვიწვიოთ კონფერენცია ლეგიტიმაციის, დემოკრატიის და ხალხის არჩევანის საკითხებზე. არადა, გარეთ, 2021 წლის გიორგობაა", — წერს ის Facebook გვერდზე.

ომბუდსმენმა, ნინო ლომჯარიამ დღეს განაცხადა, რომ მმართველი გუნდის ლიდერები, პირველ რიგში, კი მისი თავმჯდომარე, ირაკლი კობახიძე სერიოზულ პოლიტიკურ ფიგურად არ მიაჩნია. ლომჯარიას თქმით, მას არცერთ საერთაშორისო ორგანიზაციასთან თუ ქვეყანასთან ლეგიტიმაცია არ აქვს.