ქართული ოცნების დეპუტატის, ვიქტორ ჯაფარიძის აზრით, ექსპრეზიდენტი, მიხეილ სააკაშვილი იმ კანონებით უნდა გასამართლებულიყო, "როგორი კანონებითაც თვითონ ასამართლებდა". მისი თქმით, მმართველი პარტიის შეცდომაა, რომ ასე არ მოიქცნენ. ამ განცხადების ფონზე დეპუტატი ამტკიცებს, რომ არავის ციხეში ყოფნის მომხრე არ არის.

"ქართული ოცნების შეცდომა რა არის იცით? როგორი კანონებითაც თვითონ ასამართლებდა და 20-25 წლით უსჯიდა სასჯელებს, აი იმ კანონებით უნდა გასამართლებულიყო მიშა. მე არავის ციხეში ყოფნის მომხრე არ ვარ, მაგრამ ამან რაც აკეთა, ამან რაც ჩვენთან მარტო აკეთა სვანეთში. კიდევ გიმეორებთ, თქვენნაირი ლამაზი ქალები დააპატიმრა, 65 წლის ქალი, პირველი საშუალო სკოლის დირექტორი დააპატიმრა, ვისზე ლაპარაკობთ", — თქვა მან.

ჯაფარიძე ამტკიცებს, რომ ხელისუფლება პატიმარს, მოუვლის და ის ჯანმრთელად იქნება. მისივე თქმით, ომბუდსმენისა და მისი შექმნილი კონსილიუმის არ სჯერა, რადგან სახალხო დამცველი მიკერძოებულია. კითხვაზე, არის თუ არა საკმარისი საფუძველი ლომჯარიას მიერ შექმნილი მედიკოსთა ჯგუფის დასკვნა, სააკაშვილის სამოქალაქო კლინიკაში გადასაყვანად, დეპუტატი პასუხობს:

"რომელი მედიკოსებით, მე რა რომ ნინო ლომჯარიას მედიკოსები... სხვა მედიკოსები მედიკოსები არ არიან?".

გუშინ, 17 ნოემბერს სახალხო დამცველის მიერ შექმნილმა ექიმების ჯგუფმა მიხეილ სააკაშვილის ჯანმრთელობის მდგომარეობაზე დასკვნა გამოაქვეყნა. მათი შეფასებით, ექსპრეზიდენტის მდგომარეობა კრიტიკულია და მკურნალობის გაგრძელება რეკომენდებულია ფუნქციურად გამართულ, დიდი გამოცდილების მქონე პოლიპროფილურ ჰოსპიტალში. ექიმების დასკვნის მიხედვით, ამ პირობებს გლდანის მე-18 დაწესებულების კლინიკა არ აკმაყოფილებს.

ექსპრეზიდენტი უკვე 49-ე დღეა შიმშილობს. მიხეილ სააკაშვილი და მისი ადვოკატები სამოქალაქო კლინიკაში გადაყვანას ითხოვენ, თუმცა ხელისუფლება უარზეა — ამის ნაცვლად ის გლდანის ციხის სამკურნალო დაწესებულებაში იძულებით შეიყვანეს.

სტრასბურგის სასამართლომ, მხარეთა ინტერესების შესაბამისად და სასამართლო პროცედურების სწორად წარმართვისთვის, სააკაშვილს შიმშილობის შეწყვეტისკენ მოუწოდა. ამის შემდეგ სააკაშვილმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.