საპატრიარქოს საზოგადოებასთან ურთიერთობის ხელმძღვანელი, ანდრია ჯაღმაიძე კითხვას, ვის ეკისრება პასუხისმგებლობა ექსპეზიდენტის შიმშილობის შესაძლო შედეგებზე, პასუხობს, რომ ამაზე პასუხისმგებელი თავად სააკაშვილი იქნება, რადგან ის თავისი ნებით შიმშილობს.

"ალბათ, თავად იქნება პასუხისმგებელი, იმიტომ, რომ მან გადაწყვიტა შიმშილობა, მას არ ავალდებულებენ შიმშილობას, ხომ გასაგები არის?", — ამბობს ის TV პირველის ეთერში.

მისივე თქმით, სააკაშვილის შიმშილობა პოლიტიკური გადაწყვეტილებაა, რადგან მას პოლიტიკური მიზნები ამოძრავებს და ხელისუფლების შეცვლა სურს.

"როდესაც ჩვენ შიმშილობის თემაზე ვლაპარაკობთ, გვინდა ჩვენ თუ არ გვინდა, პოლიტიკურ საკითხს ვეხებით. ეს ხომ მისი პოლიტიკური გადაწყვეტილებაა, პოლიტიკურ მიზნებს ემსახურება მისი შიმშილი. ეს ხომ არ არის რაღაც სარწმუნოებრივი თემა, რომ ჩვენ ამისი გარჩევა დავიწყოთ, მართალია, მტყუანია. მას უნდა ხელისუფლების შეცვლა, ხელისუფლებაში მოსვლა, მისი მომხრეები ამბობენ ამას. მან განაცხადა, გამოვალ და ათ დღეში რაღაც პოლიტიკური პროცესები დაინიშნება", — აცხადებს ჯაღმაიძე.

მიხეილ სააკაშვილი პირველ ოქტომბერს, მას შემდეგ დააკავეს, რაც თავადვე გაავრცელა ინფორმაცია, რომ საქართველოში იმყოფება. ის 48-ე დღეა შიმშილობს. ადვოკატები, პირადი ექიმი, არასამთავრობო ორგანიზაციების ნაწილი და ოპოზიცია მის სამოქალაქო კლინიკაში გადაყვანას ითხოვენ, თუმცა ხელისუფლება უარზეა. 8 ნოემბერს ექსპრეზიდენტი გლდანის ციხის სამკურნალო დაწესებულებაში გადაიყვანეს. მოგვიანებით პენიტენციურმა სამსახურმა გაავრცელა კადრები, სადაც ჩანს, რომ ის შენობაში ძალის გამოყენებით შეჰყავთ.

მას შემდეგ, რაც სტრასბურგის სასამართლომ მიხეილ სააკაშვილს შიმშილობის შეწყვეტისკენ მოუწოდა, ხოლო მთავრობას დაავალა აცნობოს მისი ჯანმრთელობის მდგომარეობის შესახებ და უზრუნველყოს მკურნალობა შიმშილობის შემდეგ, ექსორეზიდენტმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.