ისლანდია აქამდე ვულკანებით, მყინვარული ლანდშაფტით და მომხიბლავი კულტურით იყო ცნობილი, თუმცა ქვემოთ მოცემული რეკლამის ნახვის შემდეგ დარწმუნდებით, რომ ისლანდიელებს კარგი იუმორის გრძნობაც აქვთ.

ისლანდიის ტურიზმის საბჭომ ახალი რეკლამა გადაიღო, რომლითაც მარკ ცუკერბერგის მიერ Facebook-ის ახალი Metaverse სტრატეგიის გაცნობის ვიდეოს ეხმიანებიან და კომიკურად ჰბაძავენ. კაცი, რომელიც გარეგნულად მარკს ჰგავს და მისი მანერებით ლაპარაკობს, დასცინის როგორც ფეისბუქის შემქმნელს, ასევე ახალ გაფართოებულ რეალობას.

ოქტომბერში მარკ ცუკერბერგმა 80-წუთიანი გაცნობითი ვიდეოთი წარადგინა Metaverse და შეგვატყობინა, რომ ფეისბუქისა და კიდევ რამდენიმე სხვა სოციალური ქსელის მფლობელი კომპანია სახელს იცვლიდა. თუ მარკ ცუკერბერგის ვიდეო ჯერ არ გინახავთ, აი, მისი მოკლე ვერსიაც:

ორწუთიანი ვიდეო, კი რომელიც მარკის ამ მიმართვის შთაგონებით შეიქმნა, ახალ რეალობა Icelandverse-ს წარმოგვიდგენს, რომელიც "რევოლუციური მიდგომაა იმის შესახებ, თუ როგორ დავუკავშირდეთ სამყაროს ისე, რომ ზედმეტად უცნაურები არ გამოვჩნდეთ" და როგორ შევხვდეთ "გაუმჯობესებულ რეალობას სულელური ყურსასმენების გარეშე".

ეს მოკლე მიმართვა ისლანდიის "ღია სამყაროს" აღწერს, რომელშიც "ყველაფერი რეალურია". აქ "წყალი სველია", "ცას საკუთარი თვალებით დაინახავთ" და "აქ არიან ჩიტები, რომელთა ყურებაც შეგიძლიათ". მარკის მიბაძვითა და ამ ტიპის განცხადებებით, რეკლამა ქვეყნის ულამაზეს ადგილებსა და უნიკალურობებს ნამდვილად კარგად წარმოაჩენს.

ფოტო: Getty Images

შეუძლებელია ყურადღება არ მიაქციოთ ულამაზეს მთებს, ქვეყნისთვის დამახასიათებელ გეიზერებსა თუ ჩრდილოეთის ციალს, რაც ისლანდიას მართლა უნიკალურ ადგილად აქცევს. ასე რომ, რეკლამის ნახვის შემდეგ, დიდი შანსია, ამ საოცარი ადგილების მონახულების სურვილი მართლა გაგიჩნდეთ.