მიხეილ სააკაშვილის ადვოკატის, დიტო საძაგლიშვილის ინფორმაციით, ექსპრეზიდენტს დღეს დილით კორონავირუსის PCR ტესტი აუღეს. ადვოკატის თქმით, სააკაშვილმა მათ უთხრა, რომ გლდანის მე-18 სამედიცინო დაწესებულების დირექტორთან, რომელსაც Covid-19 დაუდასტურდა, კონტაქტი არაერთხელ ჰქონდა.

"ჩვენ ვკითხეთ მიხეილ სააკაშვილს ჰქონდა თუ არა მას კონტაქტი ნომერ მე-18 სამედიცინო დაწესებულების დირექტორთან, რაზეც დაგვიდასტურა, რომ კი, ჰქონდა და არაერთხელ. უცნობია, კონკრეტულად რა დროს ჰქონდა მას ბოლო კონტაქტი, თუმცა დღეს დილას აუღეს მას PCR ტესტი და ველოდებით პასუხს", — განაცხადა საძაგლიშვილმა.

ინფორმაცია იმის შესახებ, რომ გლდანის ციხის დირექტორს კორონავირუსი დაუდასტურდა On.ge-ს დღეს, 15 ნოემბერს პენიტენციურ სამსახურში დაუდასტურეს. ინფორმაცია მისი შესაძლო ინფიცირების შესახებ მედიაში გუშინ გავრცელდა, თუმცა როგორც სააკაშვილის ექიმმა, ნიკოლოზ ყიფშიძემ განაცხადა, ციხეში მას უთხრეს, რომ დირექტორს ვირუსი არ ჰქონდა და დაწესებულებაში ცხვირის ოპერაციის გამო არ იმყოფებოდა.

ექსპრეზიდენტი უკვე 46 დღეა შიმშილობს. მიხეილ სააკაშვილი და მისი ადვოკატები სამოქალაქო კლინიკაში გადაყვანას ითხოვენ, თუმცა ხელისუფლება უარზეა — ამის ნაცვლად ის გლდანის ციხის სამკურნალო დაწესებულებაში გადაიყვანეს, სადაც იძულებით შეიყვანეს.

სტრასბურგის სასამართლოს გადაწყვეტილების შემდეგ სააკაშვილმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.

13 ნოემბერს მისმა ექიმმა განაცხადა, რომ სააკაშვილი თავს ცუდად გრძნობდა და საწოლიდან ვერ ადგა. 14 ნოემბერს კი მან აღნიშნა, რომ ექსპრეზიდენტი სუსტად არის, მაგრამ სასამართლო პროცესზე დასწრება შეუძლია. სურვილის მიუხედვად, ის პროცესზე ისევ არ დაასწრეს.