ექსპრეზიდენტის ექიმის, ნიკოლოზ ყიფშიძის განცხადებით, დღეს მიხეილ სააკაშვილი სუსტად იყო, მაგრამ თქვა, რომ მზად არის ხვალ წარსდგეს სასამართლოს წინაშე და "მზად არის, დაელაპარაკოს ქართველ ხალხს". მისივე თქმით, გუშინდელისგან განსხვავებით, დღეს ექსპრეზიდენტმა შეძლო პალატიდან ქვევით, პაემნების ოთახში ჩასულიყო.

როგორც ყიფშიძემ აღნიშნა, დაწესებულებაში იკითხა, ჩაუტარდა თუ არა ექსპრეზიდენტს კვლევა კორონავირუსზე, რაზეც უპასუხეს: "არავითარი კოვიდი აქ არ ყოფილა". თუმცა რამდენიმე საათის წინ თავად უწყებამ დაადასტურა, რომ დაწესებულებაში მყოფ გიორგი მამალაძეს კორონავირუსი დაუდასტურდა. გარდა ამისა, ყიფშიძე ამბობს, რომ იკითხა, ჰქონდა თუ არა დირექტორს კორონავირუსი და უთხრეს, რომ არა და ის ციხეში ცხვირის ოპერაციის გამო არ იმყოფება.

დღეს, 14 ნოემბერს ცნობილი გახდა, რომ დეკანოზ გიორგი მამალაძეს, რომელიც იმავე დაწესებულებაშია, სადაც მიხეილ სააკაშვილი, კორონავირუსი დაუდასტურდა. მისი ძმის, თორნიკე მამალაძის განცხადებით, დეკანოზი იზოლირებული იყო სხვა პატიმრებისა და მნახველებისგან და სავარაუდოა, რომ ვირუსი ციხის თანამშრომელმა გადადო.

მედიაში გავრცელდა ინფორმაცია, რომ ვირუსი, შესაძლოა, ციხის დირექტორს ჰქონდეს და დაწესებულება "წითელ ზონად" გამოცხადდეს. სააკაშვილის ადვოკატებმა განაცხადეს, რომ ამ ფონზე ექსპრეზიდენტის გლდანის ციხეში დატოვება გაცილებით უფრო საშიში იყო და საჭიროა მისი დაუყოვნებლივ გადაყვანა სამოქალაქო კლინიკაში.

პენიტენციურმა სამსახურმა პასუხად გლდანის ციხის საავადმყოფოს მთავარი ექიმის ვიდეო გაავრცელა, რომელშიც ის ამტკიცებს, რომ ექსპრეზიდენტ მიხეილ სააკაშვილის სიცოცხლეს საფრთხე არ ემუქრება და ციხე წითელ ზონად არ გამოცხადებულა. მისივე თქმით, დეკანოზ გიორგი მამალაძის მომსახურე პერსონალს სააკაშვილთან შეხება არ ჰქონია და სხვა პატიმრებს არ აქვთ კორონავირუსის სიმპტომები.