სულ ცოტა ხნის წინ გახდა ცნობილი, რომ საქართველოს სახელით საბავშვო ევროვიზიის წლევანდელ სიმღერის კონკურსზე ნიკოლოზ ქაჯაია წარდგება სიმღერით Let's Count The Smiles. სიმღერისა და მასზე გადაღებული ვიდეოკლიპის პრემიერა ერთად შედგა პირველი არხის გადაცემაში. საკონკურსო სიმღერის კომპოზიტორი გიგა კუხიანიძეა, ვიდეორგოლის შექმნაზე კი რეჟისორმა ზაზა ორაშვილმა იმუშავა.

10 წლის ნიკოლოზ ქაჯაიამ პრესტიჟულ საერთაშორისო კონკურსზე საქართველოს წარმომადგენლის სტატუსი საზოგადოებრივი მაუწყებლის საბავშვო მუსიკალურ პროექტში, რანინა, გამარჯვების შედეგად მოიპოვა.

რიგით მე-19 საბავშვო ევროვიზია 19 დეკემბერს, საფრანგეთის დედაქალაქ პარიზში გაიმართება. საფრანგეთი გასული წლის ევროვიზია ჯუნიორის ტრიუმფატორი გახდა, როცა 11 წლის მომღერალმა, ვალენტინამ, თავის ქვეყანას პირველი გამარჯვება მოუტანა სიმღერით J'imagine ("წარმოვიდგენ").

აღსანიშნავია, რომ საქართველო საბავშვო ევროვიზიაზე მონაწილეთა შორის რეკორდსმენია — ქვეყნის ანგარიშზე სამი გამარჯვება ირიცხება. 2008 წელს პირველი გამარჯვება ჯერ ჯგუფმა ბზიკებმა მოიპოვა, 2011 წელს პირველადგილოსანი გახდა ჯგუფი ქენდი, 2016 წელს მალტაზე გამართული კონკურსი კი მარიამ მამადაშვილმა მოიგო. ამასთან, საქართველომ ევროვიზია ჯუნიორზე ორჯერ დაიკავა მეორე ადგილი და სამჯერ მოხვდა საუკეთესო ხუთეულში.

წლევანდელ შეჯიბრებაში მონაწილეობას 19 ქვეყანა მიიღებს. მათი ნაწილი კონკურსს ორწლიანი პაუზის შემდეგ უბრუნდება — 2020-ში, კორონავირუსის პანდემიის გამო, მონაწილეობაზე უარი არაერთმა ქვეყანამ თქვა. 2021 წლის საბავშვო ევროვიზიის დევიზია Imagine ("წარმოიდგინე").