ლელოს ლიდერი ბადრი ჯაფარიძე აცხადებს, რომ პენიტენციური სამსახურის გავრცელებული კადრები დამაზიანებელია ქვეყნის რეპუტაციისთვის, ზრდის საზოგადოებაში შექმნილ დაპირისპირებას და აღრმავებს არსებულ უფსკრულს. მისივე განცხადებით, ქართულ ოცნებას უნდა ესმოდეს, რომ მათი ქმედებები იმდენად სამარცხვინოა, თუ ოდნავი თავმოყვარეობა აქვს სახელმწიფოს, არ უნდა დაუშვას ასეთი არაადამიანური მოპყრობა არავის, მითუმეტეს ყოფილი პრეზიდენტის მიმართ.

"ქართული ოცნების სრულიად გაუმართლებელმა სიჯიუტემ, გაურკვეველი ლოგიკით ნაკარნახებმა, დაჟინებულმა სურვილმა, რომ როგორმე არ დაეშვათ მიხეილ სააკაშვილის სამოქალაქო კლინიკაში გადაყვანა სადაც, გარანტირებულად დაცული იქნებოდა მისი სიცოცხლე და უსაფრთხოება, სამართალდამცავი სტრუქტურების წარმომადგენლები მიიყვანა სრულიად სამარცხვინო და ქვეყნისთვის შეურაცხმყოფელ მოქმედებებამდე!

გლდანის ციხის საავადმყოფოში მომხდარი მოვლენების ამსახველი კადრებიდან ჩანს რომ ხელისუფლების კარნახით ჩადენილი იქნა ქმედებები რომლებიც დამაზიანებელია ქვეყნის რეპუტაციისათვის, ზრდის საზოგადოებაში შექმნილ დაპირისპირებას და აღრმავებს არსებულ უფსკრულს", — აცხადებს ის.

დღეს, 11 ნოემბერს პენიტენციურმა სამსახურმა გაავრცელა კადრები, რომლებშიც ჩანს, რომ მიხეილ სააკაშვილი გლდანის ციხის სამკურნალო დაწესებულებაში ძალის გამოყენებით გადაჰყავთ. კადრების მიხედვით, სააკაშვილი სასწრაფო დახმარების მანქანიდან იძულებით გამოიყვანეს, ძალით შეიყვანეს შენობის დერეფნებსა და ლიფტშიც, კერძოდ, ფეხებსა და ხელებში ჩაავლეს ხელი, რა დროსაც ტანსაცმელი თითქმის გახდილი აქვს. ექსპრეზიდენტი ციხის საავადმყოფოს პალატაში უკვე წელზევით შიშველი შეიყავნეს და პირდაპირ იატაკზე დასვეს.

ამ ვიდეოს გამოქვეყნდებიდან რამდენიმე საათში პენიტენციურმა სამსახურმა მეორე ვიდეო გამოაქვეყნა, სადაც მიხეილ სააკაშვილი უკვე გაჩერებულ სასწარაფო დახმარების მანქანაშია და ამბობს, რომ არ გადმოვა. ის რუსთავის ციხეში დაბრუნებას ითხოვს. აღსანიშნია რომ მანამდე, პირველი ვიდეოს გავრელების შემდეგ უწყება ამტკიცებდა, რომ სააკაშვილმა რუსთავის დაწესებულება თავისი ნებით დატოვა.

პენიტენციური სამსახურის ვიდეოები დამონტაჟებულია. თითოეული მათგანის გამოქვეყნებას უწყება მაღალი საზოგადოებრივი ინტერესით ხსნის. უწყების განცხადებით, დღეს გავრცელებულ "კადრებში ნათლად ჩანს, როგორ არ ემორჩილება [სააკაშვილი] დაწესებულების თანამშრომლების კანონიერ მითითებებს, იქცევა აგრესიულად და მათ სიტყვიერ შეურაცხყოფას აყენებს".

ექსპრეზიდენტის იძულებით შეყვანის ვიდეოს გავრცელებამდე იუსტიციის მინისტრმა განაცხადა, რომ კადრებს იმის უარსაყოფად გამოაქვეყნებდნენ, რასაც სააკაშვილის ადვოკატი, ნიკა გვარამია ამტკიცებდა. მისი თქმით, გვარამიას განცხადება, დაწესებულებაში სააკაშვილის იძულებით შეყვანისა და იმის შესახებ, რომ სხვა პატიმრებს წინასწარ ჰქონდათ ინფორმაცია, სიცრუეა და ამ სიცრუეს "სულ რამდენიმე წამში" ამხელდნენ.