ნაციონალური მოძრაობის ლიდერის, ნიკა მელიას განცხადებით, ოპოზიციის აქცია ხვალ, 2 საათზე ვაჟა-ფშაველას ძეგლთან გაიმართება. ამის შესახებ მან სპეციალურ ბრიფინგზე ისაუბრა.

"ველოდებით ყველას, ვისაც მყარად მიაჩნია, რომ ხელისუფლება კოპირებს რუსეთსა და ბელარუსს", — განაცხადა მელიამ.

მელიამ კიდევ ერთხელ აღნიშნა, რომ აქციები იქნება ყოველდღე, მანამ სანამ "რეჟიმი არ გატყდება".

"არ დაიხევს უკან არავინ. დააკავეთ 46 ადამიანი? მაგრამ ხომ არ დაგავიწყდათ, რომ ასი ათასობით აქტიური მოწინააღმდეგე ჰყავს რეჟიმს, ამიტომ ეს რეჟიმი განწირულია მარცხისთვის. ახლა საჭიროა სიმტკიცე, ნებისყოფა და სიმშვიდე, ამ რეჟიმის დამარცხება მხოლოდ დროის საკითხია", — აღნიშნა მან.

ყოფილი პრეზიდენტის, მიხეილ სააკაშვილის სამოქალაქო კლინიკაში გადაყვანის მოთხოვნით, დღეს 3 სხვადასხვა ადგილას აქცია გაიმართა. აქტივისტები ჯანდაცვისა და იუსტიციის სამინისტროებთან, ასევე, სახელმწიფო უსაფრთხოების სამსახურის შენობასთან შეიკრიბნენ — ჯერ კიდევ აქციების დაწყებამდე პოლიციამ მათი დაკავება დაიწყო. შინაგან საქმეთა სამინისტროს ინფორმაციით, დღეს გამართულ აქციებზე ჯამში 46 პირია დაკავებული.

მოგვიანებით, აქციის მონაწილეებმა სასამართლოსთან გადაინაცვლეს, სადაც მიხეილ სააკაშვილის პროცესი მიმდინარეობდა. აღსანიშნავია, რომ პენიტენციურმა სამსახურმა სააკაშვილს, სურვილის მიუხედავად, სასამართლო სხდომაზე დასწრებაზე უარი უთხრა. პენიტენციური სამსახურის მტკიცებით, ამის მიზეზი სასამართლოში ესკორტირებისას შესაძლო "დესტრუქციული ხასიათის ქმედებაა".

ამასთან, სხდომაზე დღეს პროკურატურამ შუამდგომლობა დააყენა, რომ პენიტენციური დაწესებულების გადაწყვეტილების გამო, სხდომა ციხეში ჩატარდეს ან სააკაშვილი დისტანციურად ჩართონ. დღეს სააკაშვილის უფლებადამცველებმა სასამართლო პროცესი დატოვეს. ადვოკატმა ბექა ბასილაიამ განაცხადა, რომ მისთვის გაუგებარია მოსამართლის გაჯიუტება იმაზე, რომ სხდომაზე კიდევ ორი ადვოკატი, ნიკა გვარამია და დიმიტრი საძაგლიშვილი შევიდეს. მომდევნო სასამართლო სხდომა 29 ნოემბერს, 11 საათზე ჩაინიშნა.

სააკაშვილის ადვოკატმა, ბექა ბასილაიამ დღევანდელ პროცესზე მოსამართლეები აცილებაც მოითხოვა. მისი თქმით, მართლმსაჯულების აღსრულებისთვის სააკაშვილის სხდომაზე ყოფნა საჭირო იყო, თუმცა მოსამართლეებმა ეს არ გააკეთეს და "წინასწარ დაგეგმილ სცენარს" მიჰყვებოდნენ.