ყოფილი პრეზიდენტის ადვოკატის, ნიკა გვარამიას განცხადებით, პარლამენტის თავმჯდომარეს, კახა კუჭავას მიმართა, რათა ციხის კლინიკაში მიხეილ სააკაშვილის სანახავად შეუშვან. გვარამია გლდანის მე-18 დაწესებულებიდან წავიდა და ელოდება კუჭავასგან პასუხს, რათა უზრუნველყონ მისი და პირადი ექიმის ციხის კლინიკაში შესვლა.

"ბატონმა კუჭავამ იცის, როგორ მიპოვოს, იცის ჩემი ტელეფონი, თუ არ იცის ქალბატონ წულუკიანს შეუძლია, კითხოს. ველოდები მისგან პასუხს ან საჯაროს ან სატელეფონოს, ნებისმიერი პასუხი ჩემთვის არის პასუხი.

ვიმედოვნებ, რომ უზრუნველყოფილი იქნება ჩემი და მიხეილ სააკაშვილის კონსტიტუციური უფლება, ჩემი როგორც ადვოკატის და მისი, როგორც არა მხოლოდ დაცვის ქვეშ მყოფის, არამედ პაციენტის, ამიტომ ექიმის შეშვებაზეც ვსაუბრობთ თავისთავად ცხადია და შეგვიშვებენ მიხეილ სააკაშვილთან. თუ არა, ამაზე მაინც მივიღებთ პასუხს, რომ არ გვიშვებენ და ეს ჩემთვის იქნება ასევე პასუხი, თან სრულიად გასაგები შინაარსის პასუხი", — თქვა ნიკა გვარამიამ.

ნიკა გვარამიას დაწესებულებაში შესვლა და მიხეილ სააკაშვილის ნახვა სურდა. მის მისვლას თავდაპირველად ადგილზე დაცვის მობილიზება მოჰყვა, მოგვიანებით კი გამოჩნდა სპეცრაზმიც.

ამ დროისთვის სააკაშვილთან არცერთ ადვოკატს არ უშვებენ. ამჟამად პენიტენციურ დაწესებულებაში არასამუშაო საათებია, თუმცა ადვოკატები ამბობენ, რომ ახლა ორდინალური ვითარება არ არის. სააკაშვილთან შესვლას ითხოვს მისი პირადი ექიმიც.

სახალხო დამცველის განცხადებით, ციხის ადმინისტრაციას და იუსტიციის სამინისტროს სთხოვა, რომ სააკაშვილის ადვოკატები გამონაკლისის სახით ციხეში შეუშვან. მისი თქმით, მიიღო დაპირება, რომ შეუშვებენ.

ექსპრეზიდენტი მიხეილ სააკაშვილი მისი და მისი ადვოკატების სურვილის საწინააღმდეგოდ რუსთავის პენიტენციური დაწესებულებიდან გლდანის ციხის საავადმყოფოში გადაიყვანეს. ეს ინფორმაცია პენიტენციურმა სამსახურმა ერთი საათის შემდეგ დაადასტურა — მას შემდეგ, რაც რუსთავის ციხიდან აფრენილი ვერტმფრენი გლდანის ციხის თავზე გამოჩნდა. მანამდე უფლებადამცველებმა, ოჯახის წევრებმა და ომბუდსმენმა არ იცოდნენ, სად იყო სააკაშვილი. ვარაუდობდნენ, რომ მას გორის სამხედრო ჰოსპიტალში გადაიყვანდნენ.

მოგვიანებით, როცა სახალხო დამცველის წარმომადგენელი, გლდანის ციხეში სააკაშვილის სანახავად მივიდა, განაცხადა, რომ ის რუსთავის ციხიდან სასწრაფო დახმარების მანქანით გადაიყვანეს და ციხეში ძალის გამოყენებით შეიყვანეს. მანვე აღნიშნა, რომ სააკაშვილს პალატაში ესმის სხვა პატიმრების გინებისა და მუქარის ხმა. ადვოკატებმა ეს ფსიქოლოგიურ ზეწოლად და წამებასთან გათანაბრებულ ქმედებად შეაფასეს.

იუსტიციის მინისტრი ამტკიცებს, რომ რუსთავის ციხიდან გლდანში გადაყვანისას არცერთი პროცედურა და ნორმა არ ყოფილა დარღვეული. მისივე მტკიცებით, სააკაშვილმა ციხეში შეყვანისას თანამშრომლებს სიტყვიერი და ფიზიკური შეურაცხყოფა მიაყენა, რაზეც გენერალურმა ინსპექციამ გამოძიება დაიწყო.

სააკაშვილის ციხეში შეყვანის შემდეგ ადგილზე სპეცრაზმი, წყლის ჭავლის მანქანა და დამატებითი საპოლიციო ძალები შეიყვანეს. გარდა ამისა, ციხეში მიიტანეს კომპიუტერული ტომოგრაფიის აპარატი. მანამდე რამდენიმე დღით ადრე კი უწყება ამტკიცებდა, რომ ციხის კლინიკა საჭირო ტექნიკით აღჭურვილია.

ამავე თემაზე:

• ვითხოვ, მოვითხოვ, ვთხოვ, არ ვიცი კიდევ რა სიტყვები გამოვიყენო, რომ ვნახო პრეზიდენტი სააკაშვილი — ექიმი
• ვითხოვთ, დაუყოვნებლივ მოგვეცეს მიხეილ სააკაშვილთან შეხვედრის შესაძლებლობა — ადვოკატი
• უკრაინის საგარეო უწყება საქართველოს სააკაშვილის სამოქალაქო კლინიკაში დაუყოვნებლივ გადაყვანისკენ მოუწოდებს
• სააკაშვილის მოტაცება გულისხმობდა იმას, რომ ყოფილიყო მოწოდებები სადღაც შეჭრისკენ — მელია