ნაციონალური მოძრაობის თავმჯდომარე ნიკა მელია აცხადებს, რომ ხელისუფლებამ უკადრებელი იკადრა და პატიმრობაში მყოფი, მოშიმშილე ექსპრეზიდენტი, მიხეილ სააკაშვილი იძულებული გახადა მშრალ შიმშილზე გადასულიყო. მელიას თქმით, სააკაშვილს მედიკამენტები რომ არ მიეღო, დღეს ცოცხალი აღარ იქნებოდა და ახლა მისი სიცოცხლის დღეები დათვლილია.

"უკადრებელი იკადრეს გუშინ, დღეს გააგრძელეს და მიხეილ სააკაშვილი აიძულეს პრაქტიკულად მშრალ შიმშილობაზე გადასულიყო და უარი თქვა მედიკამენტების მიღებაზეც კი. ეს მედიკამენტები მას ამ დღეების განმავლობაში რომ არ მიეღო, დღეს ცოცხალი აღარ იქნებოდა და ამაში დასდეს ბრალი, რომ მედიკამენტებს იღებსო, დღეს აღარც იღებს ამ მედიკამენტებს. ამიტომ, მიხეილ სააკაშვილის სიცოცხლის დღეები, სამწუხაროდ მიწევს ამის თქმა, არის დათვლილი. დღეებიც და საათებიც", — აცხადებს ის.

დღეს პენიტენციურმა სამსახურმა გაავრცელა კადრები, სადაც, მათი მტკიცებით, ექსპრეზიდენტი, მიხეილ სააკაშვილი "საკვებს იღებს". პენიტენციურის თქმით, აღნიშნული მაღალი საზოგადოებრივი ინტერესიდან გამომდინარე გაასაჯაროვეს.

როგორც 6 ნოემბერს სახალხო დამცველმა განაცხადა, ექსპრეზიდენტი, მიხეილ სააკაშვილი 30 ოქტომბრიდან წვენებსა და მინერალური შემცველობის პიურეებს სამედიცინო დანიშნულებით, მცირე ოდენობით იღებდა. ომბუდსმენი მიღებული ინფორმაციის საფუძველზე ამბობს, რომ სააკაშვილი პირველი ოქტომბრის შემდეგ უწყვეტად შიმშილობს და საკვებს არ იღებს.

ამასთან, ომბუდსმენი იუსტიციის სამინისტროს მიერ ექსპრეზიდენტის, მიხეილ სააკაშვილის პატიმრობის პირობებისა და ჯანმრთელობის შესახებ განსაკუთრებული კატეგორიის პერსონალური მონაცემების გაცემისა და საჯაროდ გამოქვეყნების საკითხს შეისწავლის.

სახალხო დამცველმა ეს გადაწყვეტილება მას შემდეგ მიიღო, რაც გუშინ, 5 ნოემბერს იუსტიციის მინისტრმა, რატი ბრეგაძე განაცხადა, რომ მიხეილ სააკაშვილი გარკვეული დროის შემდეგ ფაფებისა და ნატურალური წვენების მიღებას დათანხმდა.

გარდა ამისა, დღეს ექსპრეზიდენტის მორიგი წერილი გავრცელდა, სადაც წერს, რომ 30 ოქტომბრის შემდეგ, ციხის სამედიცინო დეპარტამენტის რეკომენდაციით, რამდენიმე ბოთლი წვენი მიიღო, თუმცა მისი თქმით, დილიდან უარი თქვა არა მხოლოდ წვენზე, არამედ მინერალებისა და ვიტამინებზე. მისივე თქმით, არ იღებს არანაირ საკვებს.

აღსანიშნავია, რომ 5 ნოემბერს სახელმწიფო ინსპექტორის სამსახურმა გაავრცელა განცხადება, სადაც ნათქვამი იყო, რომ მნიშვნელოვანია დაცული იყოს მოშიმშილე თავისუფლებააღკვეთილი პირის პირადი ცხოვრების ხელშეუხებლობა, მისი პერსონალური, განსაკუთრებით კი, მისი ჯანმრთელობის მდგომარეობის შესახებ მონაცემები. ინსპექტორის სამსახურმა მოუწოდა ყველას, განსაკუთრებული სიფრთხილით მოეკიდონ მოშიმშილე პატიმრის მიმართ თითოეული გადაწყვეტილების მიღებას და ყოველ ინდივიდუალურ შემთხვევაში შეაფასონ ადამიანის უფლებათა დარღვევის რისკები.

პატიმრის უფლებებზე ისაუბრა სახალხო დამცველის მოადგილემ, გიორგი ბურჯანაძემაც. მან განმარტა, რომ განცხადებები მოშიმშილე პატიმარზე დელიკატური უნდა იყოს, რათა მან შიმშილობის უფრო მკაცრ ფორმებს არ მიმართოს.

სააკაშვილი უკვე 37-ე დღეა შიმშილობს. მისი პირადი ექიმი აცხადებს, რომ ექსპრეზიდენტს ექიმების მეთვალყურეობა სჭირდება და საჭიროა კლინიკაში გადაყვანა. პენიტენციური სამსახური სააკაშვილს მხოლოდ ციხის კლინიკაში გადაყვანას სთავაზობს, ის უარზეა.

პროტესტის ნიშნად სააკაშვილმა უარი თქვა ნებისმიერ სამედიცინო დახმარებასა და ტესტების გაკეთებაზე. თუმცა დღეს, 3 ნოემბერს მისმა ექიმმა განაცხადა, რომ ის თავს სუსტად გრძნობს და ანალიზების გაკეთებაზე დაითანხმეს. ამ ეტაპზე სააკაშვილი უარს ამბობს ექიმების კონსილიუმთან თანამშრომლობაზე.