საგარეო საქმეთა მინისტრის, დავით ზალკალიანის განცხადებით, სამოქალაქო კლინიკაში სააკაშვილის გადაყვანაზე უკრაინასთან კომუნიკაცია არ ჰქონიათ. მისივე თქმით, არ ყოფილა საუბარია მესამე პრეზიდენტის ექსტრადაციასთან დაკავშირებითაც.

"არ მიგვიღია მსგავსი შეტყობინება არანაირი ოფიციალური არხებით, არც ექსტრადირებასთან დაკავშირებით, ექსტრადირებაზე საუბარი სამართლებრივად ნონსენსია, გამომდინარე იქიდან, რომ ექსტრადირება ხდება მაშინ, როცა ამა თუ იმ პირს აქვს შესაბამისი დანაშაული ჩადენილი იმ ქვეყანაში.

აი, გეუბნებით. მე ვარ ქვეყნის საგარეო საქმეთა მინისტრი, ვიცე პრემიერი, სრული პასუხისმგებლობით გეუბნებით, რომ არანაირი მსგავსი კომუნიკაცია არც პრემიერმინისტრთან, არც მსგავსი რაღაც საუბარი ჩვენ შორის არ ყოფილა, გიდასტურებთ ამას", — აცხადებს ის ჟურნალისტების კითხვის საპასუხოდ.

სააკაშვილი პირველ ოქტომბერს დააკავეს. ის ბრალს არ აღიარებს და უკვე 36-ე დღეა შიმშილობს. მისი პირადი ექიმი აცხადებს, რომ ექსპრეზიდენტს ექიმების მეთვალყურეობა სჭირდება და საჭიროა სამოქალაქო კლინიკაში გადაყვანა. პენიტენციური სამსახური სააკაშვილს მხოლოდ ციხის კლინიკაში გადაყვანას სთავაზობს, რაზეც ყოფილი პრეზიდენტი უარს აცხადებს.