საქართველოს დემოკრატიული ინიციატივის თავმჯდომარის, ედუარდ მარიკაშვილის განცხადებით, ყველა მოქმედი მოსამართლე, ვინც საერთაშორისო პარტნიორებზე ადმინისტრაციული კომიტეტის განცხადებას არ ემიჯნება, ძირს უთხრის სასამართლოს ლეგიტიმურობას. მისი თქმით, მოსამართლეთა ნაწილის პროტესტი დასაფასებელი პროცესია და საზოგადოება უნდა იცნობდეს მათ, ვინც განსხვავებულ მოსაზრებას აფიქსირებს.

"თვალს ვადევნებთ უიშვიათეს შემთხვევას ქართული მართლმსაჯულების ისტორიაში. სასამართლოს ადმინისტრაციული კომიტეტის მიერ მოსამართლეთა კორპუსის სახელით გაკეთებული ბრიყვული განცხადების შემდეგ, რომლითაც სასამართლო ხელისუფლებამ ჩვენი ქვეყნის სტრატეგიული პარტნიორები, მართლმსაჯულების სისტემაში მიმდინარე მოვლენების კრიტიკის გამო, ქვეყნის შიდა საქმეებში ჩარევასა და ვენის კონვენციის დარღვევაში დაადანაშაულა, საჯაროდ გამოჩნდნენ მოსამართლეები, რომლებიც ამ უმსგავსო განცხადებას გმობენ და ემიჯნებიან. ამბობენ, რომ განცხადება არ გამოხატავს მათ პოზიციას.

ეს კარგი და დასაფასებელი პროცესია. რადგან, საბოლოოდ უნდა ვიცოდეთ ვინ არიან ის მოსამართლეები ვინც, როგორც მათ აშშ-ს საელჩო უწოდებს, ძირს უთხრიან სასამართლოს ლეგიტიმურობას. შესაბამისად, ყველა მოქმედი მოსამართლე, ვინც კომიტეტის განცხადებას არ გაემიჯნება ძირს უთხრის სასამართლოს ლეგიტიმურობას და დავარქმევთ მათ თავის სახელს", — წერს ის.

ამასთანავე, მარიკაშვილის თქმით, კომიტეტის განცხადებას 18 მოსამართლე ემიჯნება. ესენი არიან:

უზენაესი სასამართლო

• ნინო ბაქაქური;
• ეკატერინე გასიტაშვილი;

სააპელაციო სასამართლო

• ქეთევან მესხიშვილი — თბილისის აპელაცია;
• შოთა გეწაძე — თბილისის აპელაცია;
• გელა ბადრიაშვილი — თბილისის აპელაცია;

რაიონული/საქალაქო სასამართლოები

• ეკა არეშიძე — თბილისის საქალაქო;
• ზაზა მარტიაშვილი — თბილისის საქალაქო;
• თამარ ხაჟომია — თბილისის საქალაქო;
• გიორგი ებანოიძე — თბილისის საქალაქო;
• ხათუნა ჯინორია — თბილისის საქალაქო;
• მადონა მაისურაძე — რუსთავის საქალაქო;
• ციცინო კიკვაძე — ქუთაისის საქალაქო;
• ლევან დარბაიძე — გორის რაიონული;
• ნინო გერგაული — გორის რაიონული;
• ბადრი ნიპარიშვილი — თეთრიწყაროს რაოინული;
• მამუკა წიკლაური — თელავის რაიონული;

თბილისის საქალაქო სასამართლო

• მანანა მესხიშვილი;
• თამარ ჩიხლაძე.

31 ოქტომბერს, არჩევნების მეორე დღეს იუსტიციის უმაღლესმა საბჭომ ორი ახალი მოსამართლე წევრი, პაატა სილაგაძე და გიორგი გოგინაშვილი აირჩია. ამ გადაწყვეტილებას კრიტიკა მოყვა, როგორც ადგილობრივ, ისე საერთაშორისო დონეზე.

კარლ ჰარცელმა განაცხადა, რომ ევროკავშირი კვლავ მზად არის მხარი დაუჭიროს საქართველოს, თუმცა დახმარება დამოკიდებული იქნება ძირითადი რეფორმების განხორციელებაზე. ევროკავშირის ელჩის თქმით, საბჭოს 2 წევრის არჩევა იყო ნაჩქარევი, გაუმჭვირვალე და არაკონკურენტული. მან ასევე აღნიშნა, რომ ეს იყო ბოლო 4 თვის განმავლობაში რიგით მე-5 უკან გადადგმული ნაბიჯი. აშშ-ის საელჩომაც განაცხადა, რომ ეს პროცესი არც კონკურენტული იყო და არც გამჭვირვალე. მათ ხაზი გაუსვეს, რომ შერჩევა მაშინ მოხდა, როდესაც ქვეყნის ყურადღება გადატანილი იყო მუნიციპალურ არჩევნებზე.

რაც შეეხება ადგილობრივ ორგანიზაციებს, საქართველოს დემოკრატიული ინიციატივის განცხადებით, ახალი წევრების არჩევა არის სასამართლოში არსებული ე.წ კლანის წარმატებული მცდელობა შეინარჩუნოს გავლენები. ახალგაზრდა იურისტთა ასოციაციაც ამბობს, რომ ეს კლანური მმართველობის მანიპულაციაა. დამოუკიდებელი იურისტების ჯგუფი კი აცხადებს, რომ მოსამართლეები ამჯერადაც მოწყვლადი აღმოჩნდნენ გავლენიანი ჯგუფის ნების წინააღმდეგ.

პასუხად მოსამართლეთა კონფერენციის ადმინისტრაციულმა კომიტეტმა განცხადება გაავრცელა, რომელშიც ამბობს, რომ შეფასებები გადაჭარბებული, დაუსაბუთებელი და წინააღმდეგობრივია და ეს გადაწყვეტილება ქვეყნის ევროინტეგრაციის პროცესს ვერანაირად დააზიანებს. მათივე აზრით, გაუგებარია, რატომ შეფასდა 31 ოქტომბერს კონფერენციის ჩატარება ნაჩქარევად, როდესაც ის საერთო სასამართლოების შესახებ საქართველოს ორგანული კანონის სრული დაცვით ჩაინიშნა.

ამავე თემაზე:

• იუსტიციის უმაღლეს საბჭოში ორი ახალი წევრის ამ ფორმით და ამ დროს არჩევა გაუგებარი ნაბიჯია — ზურაბიშვილი
• ხელისუფლებამ ისევ დაარღვია აღებული ვალდებულებები — სტრატეგია აღმაშენებელი იუსტიციის საბჭოში 2 წევრის არჩევაზე
• შესაძლოა, მთავრობა იმაზე ნაკლებად ესწრაფვის ევროპულ მომავალს, ვიდრე ამას ამტკიცებს — კორტნი
• ეს არ არის დემოკრატია — იან კელი იუსტიციის საბჭოში 2 ახალი წევრის არჩევაზე