ნაციონალური მოძრაობის თავმჯდომარის, ნიკა მელიას განცხადებით, გუშინ დავინახეთ საქართველოს მეხუთე პრეზიდენტი მომლოდინე რეჟიმში, თუ როდის "მოკვდება ქვეყნის მესამე პრეზიდენტი". ამის შესახებ მელიამ ქუთაისში მიმდინარე აქციაზე ისაუბრა.

"ტრაგედიას ვადევნებდი თვალყურს გუშინ და არა მარტო მე, თქვენც, როდესაც დიახაც, ტრაგიკული სცენარი გათამაშდა ჩვენს თვალწინ, როდესაც ქვეყნის მეხუთე პრეზიდენტი დასცინის მოშიმშილე, მომაკვდავ ქვეყნის მესამე პრეზიდენტს. თავი დავანებოთ სახელებსა და გვარებს ერთი წამი.

ქვეყნის მეხუთე პრეზიდენტი, ვინც არ უნდა იყოს, ქვეყნის მესამე პრეზიდენტს, აქაც ერთი წუთით შევეშვათ, ვინც არ უნდა იყოს, დასცინის, აბუჩად იგდებს და ისტორიულ უსამართლობას რომ ბოლო მოუღოს, ამას კი არ ცდილობს, უბრალოდ დავინახეთ ქვეყნის მეხუთე პრეზიდენტი მომლოდინე რეჟიმში, როდის მოკვდება ქვეყნის მესამე პრეზიდენტი. ეს არის ისტორიული უსამართლობა, რომელსაც წინ უნდა აღვუდგეთ ჩვენ", — განაცხადა მელიამ.

3 ნოემბერს ზურაბიშვილის საგანგებო ბრიფინგი გაიმართა. პრეზიდენტმა ბრიფინგი "თავისუფლად ჩატარებული" არჩევნების შეჯამებით, შედეგებზე საუბრითა და მილოცვებით დაიწყო, შემდეგ კი პანდემიაზე, ვაქცინაციაზე და ამ საკითხისადმი ეკლესიის დამოკიდებულებაზე ისაუბრა. ექსპრეზიდენტის ჯანმრთელობასთან დაკავშირებული სავარაუდო საფრთხეები თითქმის 15-წუთიანი ბრიფინგის ბოლო საკითხი იყო.

გაიგეთ მეტი: