"ვაპირებ, რომ გავჩუმდე, მაგრამ ყველამ ყველაფერი იცის ისედაც", — ამბობს ქუთაისის 90-ე საარჩევნო უბნის კომისიის წევრი, იზა ჩირგაძე ტელეკომპანია ფორმულასთან საუბრისას. მისივე თქმით, დაკითხვაზე პოლიციის მხრიდან არანაირი ზეწოლა არ ყოფილა.

"წამიყვანეს, ხომ იყო ყველანაირად მშვიდობა დამუქრების მხრივ, არანაირი ზეწოლა დაკითხვის დროს, ჩვეულებრივად იკითხეს, ვინმემ რამე ზეწოლა [ხომ არ განახორციელა] ან რამე საფრთხეში ხომ არ ხარო", — აღნიშნა მან.

ჩირგაძის თქმითვე, ტელეფონის გამორთვისა და Facebook-ის გაუქმების გადაწყევტილება იმიტომ მიიღო, რომ საზოგადოებისგან სალანძღავ შეტყობინებებს იღებდა. კომისიის წევრის განცხადებით, ერჩივნა, რომ მისი და მისი ოჯახისთვის ყველაფერი მშვიდ ვითარებაში დასრულებულიყო.

"საზოგადოებას მოვუწოდებ, ტყუილს არავინ არ ამბობს, შეეშვან ყველას ლანძღვას, ყველამ მიხედოს საკუთარ თავს [...] რაც იყო, იყო ისე, დავტოვეთ ისე, ყველამ ყველაფერი იცის, არც ზედმეტს დავამატებ, არც მეტს დავამატებ. ყველამ ყველაფერი იცის, რა სიტუაციაა, რა მოხდა", — ამბობს ის.

გუშინ, 3 ნოემბერს იზა ჩირგაძე პოლიციაში გამოკითხვაზე იმყოფებოდა. ამის შემდეგ ის მედიასთან პირველად გამოჩნდა და განაცხადა, რომ არანაირი საფრთხის წინაშე არ ყოფილა. მისივე თქმით, მუქარას ადგილი არ ჰქონია და სოფელში ნათესავის დასახმარებლად იყო ჩასული.

პირველ ნოემბერს იზა ჩირგაძემ განაცხადა, რომ ქართული ოცნების წარმომადგენელი მმართველი პარტიის სასარგებლოდ ხმების გაყალბებას აიძულებდა. მისი თქმით, ეს არ გაუკეთებია, რის შემდეგაც მასზე ზეწოლას ახდენდნენ, ის კი ენმ-ს დაუკავშირდა და მომხდარის შესახებ ინფორმაცია მიაწოდა.

2 ნოემბერს, პრესკონფერენციის მეორე დღეს, ხატია დეკანოიძემ თქვა, რომ ჩირგაძეს ვეღარ უკავშირდებოდა. მოგვიანებით, განცხადება გაავრცელა არასამთავრობო ორგანიზაცია ISFED-მაც, რომელმაც მისი უფლებების დაცვის მზაობა გამოთქვა, თუმცა, ორგანიზაციაში ამბობდნენ, რომ დილიდან მასთან დაკავშირებას ვერ ახერხებდნენ. 3 ნოემბერს ტელეკომპანია ფორმულამ გაავრცელა ინფორმაცია, რომ ჩირგაძე ერთ-ერთ სოფელში იმყოფებოდა.

გაიგე მეტი: