პარტია ლელოს ლიდერი, მამუკა ხაზარაძე ამბობს, რომ კოალიციის ფოკუსი ახლა არის ადგილზე და არანაირ ქუჩაში გადანაცვლებას არ განიხილავენ. მისი თქმით, მნიშვნელოვანია, თითოეული ხმა იყოს დაცული.

"ჩვენი ფოკუსი ახლა არის ადგილებზე, არანაირი ქუჩაში გადანაცვლებაზე საუბარი არ არის ამ ეტაპზე. ჩვენ ახლა ვსაუბრობთ, რომ თითოეული ხმა იქნას დაცული და ის ოქმები შედგეს და ის დარღვევებიც, რომელიც ახლა მიმდინარეობს, რომ ჩვენ რეალურად გვქონდეს შედეგი. საერთაშორისო პარტნიორებს მივაწოდოთ ყველა დარღვევა. ყველაფერი ახლა გროვდება", — ამბობს ხაზარაძე.

ხაზარაძემ ასევე თქვა, რომ ქართულ ოცნებას ვერ "ჩაადებინებენ ჯიბეში" იმას, რაც მათ არ ეკუთვნით. მისი თქმით, ბოლომდე იბრძოლებენ თითოეული ხმისთვის დასაცავად.

"ბრძოლა გაგრძელდება ბოლომდე, გაგრძელდება თითოეული ხმის დასაცავად. ჩვენ ქართველი ხალხის ხმებს არ გავატანთ და არ მოვაპარინებთ ქართულ ოცნებას, ეს არის გამორიცხული, რადგან სასწორზე დევს ჩვენი ხვალინდელი დღე და ვერ ჩავადებინებთ ჯიბეში იმას, რაც მათ არ ეკუთვნით. ეს არის ჩვენი მყარი პოზიცია, ამიტომ, ყველა ჩვენს მხარდამჭერს, ჩვენს დამკვირვებლებს უბნებზე მოვუწოდებთ, რომ არანაირი მოდუნება, ბოლომდე ვიბრძვით თითოეული ხმისთვის. ჩვენი წარმომადგენლები ყველა ოლქში გამოვლენ, თავის სიტყვას იტყვიან, თუ რა ხდება ადგილებზე", — თქვა მამუკა ხაზარაძე.

მამუკა ხაზარაძემ აღნიშნა, რომ შანტაჟის, მოსყიდვისა და ადმინისტრაციული რესურსის გამოყენების შედეგად, ქართულმა ოცნებამ მაინც "წააგო".

"რაც მოვისმინეთ ჩვენ, ეს მანიპულაცია, რომელსაც წლების განმავლობაში ეწევა ქართული ოცნება და მისი ახლანდელი თავმჯდომარე, არის აბსურდი. თვითონ ის ფაქტი, რაც მან გამოაცხადა, რომ სულ რაღაც 0,5%-ით, 0,8%-ით იგებენ არჩევნებს, უკვე მიუთითებს ასეთი შანტაჟის, ამხელა მოსყიდვის, ამდენი ადმინისტრაციული რესურსის გამოყენების შედეგად, ეს უკვე ნიშნავს, რომ მაქსიმალურად ყველა ამ უბნებში და ქალაქებში წააგეს", — ამბობს ხაზარაზე.

ქართული ოცნების თავმჯდომარემ, ირაკლი კობახიძემ განაცხადა, რომ როდესაც 100 000 ხმით აქვს ოპოზიციას ქალაქში არჩევნები წაგებული, ხმის დაცვაზე ვერ იქნება საუბარი. მისივე თქმით, ოპოზიციამ ე.წ. რეფერენდუმის მეორე ტურში ყველაფერი წააგო.

ნახეთ არჩევნების მეორე ტურის შედეგები დეტალურად On.ge-ზე: