დროას ლიდერის, ელენე ხოშტარიას განცხადებით, ქართული ოცნების წარმომადგენლები დიღომში, უფასო სასადილოში, შშმ პირს დაემუქრნენ, რომ საჭმელს არ აჭმევდნენ, თუ ხმის მისაცემად უბანზე არ წავიდოდა. მან ასევე თქვა, რომ ეს ქალი კოვიდინფიცირებული იყო.

"დიღომში, პეტრიწის 9 ნომერში, უფასო სასადილოში, ქალბატონს პირდაპირ დაემუქრნენ, 4 შვილის დედას, უფასო სასადილოში, შშმ პირს პირდაპირ დაემუქრნენ, რომ ვერ მიიღებდა საჭმელს, თუ არ მივიდოდა არჩევნებზე. ამ ქალს აქვს კოვიდი და აძალებდნენ კოვიდიანს, რომ მისულიყო უბანზე. ის არ მივიდა, მაგრამ მინდოდა ეს მაგალითი მომეყვანა იმ ამორალურობის საჩვენებლად, რომელსაც ჩვენ ისტერიკაში მყოფი ქართული ოცნებიდან ვხედავთ", — თქვა ხოშტარიამ.

On.ge ცდილობს ამ საკითხზე მერიასთან დაკავშირებას.

დღეს, 30 ოქტომბერს ადგილობრივი თვითმმართველობის არჩევნების მეორე ტური ტარდება. მერი 15 თვითმმართველ თემსა და 5 თვითმმართველ ქალაქში, მათ შორის, თბილისში აირჩევა. გარდა ამისა, მეორე ტური გაიმართება 24 საარჩევნო ოლქში, რომლის შედეგად აირჩევა 42 მაჟორიტარი.