ქართული ოცნების დეპუტატი ალუდა ღუდუშაური ნაციონალურ მოძრაობას ემუქრება და ამბობს, რომ "ჭკვიანად იყვნენ, თორემ ცხვირში მოხვდებათ". დეპუტატის თქმით, კანონისა და ქვეყნის ინტერესების ფეხქვეშ გათელვის შემთხვევაში, კანონი, რა თქმა უნდა, პასუხს მოგთხოვს.

"ჭკვიანად იყვნენ, თორემ მოხვდებათ ცხვირში მაგათ. როდესაც კანონს დაარღვევ და ფეხქვეშ გაიფენ ქვეყნის ინტერესებს, რა თქმა უნდა, აქ კანონი იმუშავებს და მოგთხოვს პასუხს. აქტიურ საარჩევნო კამპანიას ვიწყებთ და ეს კამპანია ბოლომდე მიიყვანს გამარჯვებას... არსად არაფერი წაგვიგია", — უთხრა ღუდუშაურმა მთავარ არხს.

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა ამჯერად ეს არ იყო მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებდა. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო.

ცენტრალური საარჩევნო კომისიის მონაცემებით, თვითმმართველობის არჩევნების მეორე ტური 20 მუნიციპალიტეტში გაიმართება. მეორე ტური ჩატარდება თბილისშიც.