ქართული ოცნების წევრის, სოზარ სუბარის განცხადებით, ნაციონალურმა მოძრაობამ ექსპრეზიდენტის, მიხეილ სააკაშვილის მხარდამჭერ აქციაზე, მაქსიმალური ძალისხმევით შეძლო, რომ "სადღაც 13 ათასი ადამიანისთვის" მოეყარა თავი. ამის შესახებ მან ტელეკომპანია იმედის ეთერში ისაუბრა.

"თამამად შემიძლია ვთქვა, რომ ეს იყო სასოწარკვეთილი და მრავალგზის დამარცხებული ძალის ბოლო გაბრძოლება. უბრალოდ მათმა ლიდერმაც დაინახა, მე მგონი, დღეს, რომ არანაირი მოლოდინი არ უნდა ჰქონდეს, რომ მას ვადამდე ადრე გათავისუფლება ელოდება. იმიტომ, რომ ადამიანი, რომელიც ელოდა, რომ 100 ათასობით ადამიანი გამოვარდებოდა ქუჩაში, 100 ათასობით კაცი დახვდებოდა, არ ვიცი, საზღვართან სადღაც, რომ მისი გათავისუფლება მოეთხოვათ, უცებ პარტიის მაქსიმალური ძალისხმევით, უზარმაზარი ფულის ხარჯვით შეძლეს, რომ სადღაც 13 ათასი ადამიანისთვის მოეყარათ თავი და ისიც კი ვერ გაბედეს, რომ დაეანონსებინათ პერმანენტული აქციები", — თქვა მან.

14 ოქტომბერს თავისუფლების მოედანზე მიხეილ სააკაშვილის მხარდასაჭერი აქცია გაიმართა. აქციის მიმდინარეობისას ინტერნეტის ხარვეზზე საუბრობდა მთავრი არხის გენერალური დირექტორი, ნიკა გვარამიაც. ის ამბობდა, რომ აქციაზე "ყველაფრის დახშობა დაიწყეს".

სააკაშვილის მხარდამჭერ აქციაზე დღეს ათასობით ადამიანი საქართველოს სხვადასხვა რეგიონიდან ჩამოვიდა. სიტყვით გამოსვლისას სააკაშვილის ადვოკატმა, ნიკა გვარამიამ ექსპრეზიდენტის მორიგი წერილი წაიკითხა. წერილში ის საზოგადოებას "დიდი შერიგებისკენ" მოუწოდებს და ამბობს, რომ გვერდზე უნდა გადავდოთ წყენა და უარყოფითი ემოციები, რადგან კიდევ ერთი რევანში მორალურად გაგვანადგურებს.

სააკაშვილი პირველ ოქტომბერს დააკავეს. მან იმავე დღეს შიმშილობა გამოაცხადა. 10 ოქტომბერს, მისმა პირადმა, ექიმმა ნიკოლოზ ყიფშიძემ თქვა, რომ ექსპრეზიდენტის მდგომარეობა დამძიმდა. მომდევნო დღეს სააკაშვილის ადვოკატმა, ნიკა გვარამიამ განაცხადა, რომ ექსპრეზიდენტის ჯანმრთელობის მდგომარეობა დამაკმაყოფილებელია და ამ საკითხებით უტრირება არ ღირს.