ლელოს ერთ-ერთი ლიდერის, მამუკა ხაზარაძის განცხადებით, ცაგერში ექსპრემიერის, გიორგი გახარიას პარტიის კანდიდატს მხარს დაუჭერენ. მისი თქმით, მნიშვნელოვანია, რომ "იმაზე მაღლა დავდგეთ, ვიდრე პიროვნული ამბებია".

"მიუხედავად ჩემი დამოკიდებულებისა პირადად ბატონ გახარიას მიმართ, ჩვენ ცაგერში მის კანდიდატს მხარს დავუჭერთ. იმიტომ, რომ ძალიან მნიშვნელოვანია, რომ იმაზე მაღლა დავდგეთ, ვიდრე პიროვნული ამბებია — იმიტომ, რო პიროვნული ამბები გაირკვევა, დამალული არაფერი არ იქნება", — განაცხადა მან ფორმულას ეთერში.

მისივე თქმით, გიორგი გახარიასთან, როგორც ყოფილ პრემიერთან, ბევრი კითხვა აქვს.

"რა თქმა უნდა, 20 ივნისი და ბევრი სხვა რაღაცა, ეს ვიგულისხმე მე იმიტო, რო არ გეგონოთ, რო რაღაც პიორვნულ რაღაცაზე ვსაუბრობ, რა. მე ვლაპარაკობ ქვეყნის ყოფილ პრემიერზე, რომელთანაც ბევრი კითხვა მაქვს, როგორც მოქალაქეს და როგორც ადამიანს, რომელსაც სხვა ურთიერთობა ჰქონდა...

რა თქმა უნდა, არცერთი პირადი საკითხი არ არის, ეს არის ქვეყნის საკითხი ყველა, ამიტომ ჩემი გადასახედიდან, ჩვენ უნდა მივეჩვიოთ და ვისწავლოთ იმაზე მაღლა დადგომა, ვიდრე პოლიტიკაა; იმაზე მაღლა დადგომა, ვიდრე წყენაა იმიტო, რო ადრე თუ გვიან ყველაფერი ნათელი უნდა გახდეს. მე ვენდეტას კი არ ვითხოვ, მე ვითხოვ, რომ საზოგადოებამ გაიგოს, რა მოხდა რეალურად, ვინ როგორ იმოქმედა: სახელმწიფოებრივად თუ სახელმწიფოს საწინააღმდეგოდ", — თქვა მამუკა ხაზარაძემ.

წამყვანმა მას ჰკითხა, იდგა თუ არა ამ გადაწყვეტილების უკან რაიმე კონსულტაცია, რაც ხაზარაძემ უარყო. მისი თქმით, ყველაზე მნიშვნელოვანია, რომ ქართულ ოცნებას გამოართვან მიტაცებული ხელისუფლება, რომელსაც ქართველი ხალხის წინააღმდეგ ბოროტად იყენებს.

ლელომ ჯერ კიდევ 3 ოქტომბერს განაცხადა, რომ მეორე ტურში ოპოზიციის კანდიდატებს მხარს დაუჭერენ, თუმცა უცნობი იყო შეეხებოდა თუ არა ეს გადაწყვეტილება გახარიას პარტიას.

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო.

ცენტრალური საარჩევნო კომისიის მონაცემებით, თვითმმართველობის არჩევნების მეორე ტური 20 მუნიციპალიტეტში გაიმართება. მეორე ტური ჩატარდება თბილისშიც.