საქართველოს შინაგან საქმეთა მინისტრი გიორგი მღებრიშვილი რამდენიმე წუთის წინ ვარდების მოედანზე დამოუკიდებლობის დღესთან დაკავშირებით მოწყობილ მინი ქალაქს ეწვია, სადაც 26 მაისის მნიშვნელობაზე ისაუბრა:

"ეს არის დღე, რომელიც ყოველთვის, ყოველ წელიწადს იზიარებს ორ ემოცია - ეს არის ტრივილი და სიხარული - სიხარული დამოუკიდებლობის მოპოვებისა და ტკივილი იმ ადამიანების დაკარგვისა, რომლებმაც თავი შესწირეს საქართველოს დამოუკიდებლობას. ჩვენ ყოველთვის გამოწვევებისა და პრობლემების წინაშე ვიდექით, მაგრამ ვმოძრაობდით განვითარების მიმართულებით, ჩვენ ერთი დღეც და ერთი წუთიც არ გავჩერებულვართ. მე პირობას ვიძლევი, რომ გავაკეთებ ყველაფერს იმისთვის, რომ მომავალმა თაობამ იცხოვროს უსაფრთხო და ერთიან საქართველოში. ეს პატარა ქალაქიც სწორედ ბავშვებისთვის მოვაწყვეთ, მათი გულის გასახარად".

ვარდების მოედანზე შსს-ს სხადასხვა დეპარტამენტის სტენდია გამოფენილი. შინაგან საქმეთა სამინისტროს გარდა, ვარდების მოედნიდან თავისუფლების მოედნამდე რუსთაველის გამზირზე სხვადასხვა სამინისტროების სტენდებია გაშლილი. 12:00 საათზე თავისუფლების მოედანზე ფიცის დადება დაიწყება, რასაც მთავრობის წევრები დაესწრებიან.