ევროპული საქართველოს ლიდერის, გიგა ბოკერიას განცხადებით, ქართული ოცნება ადგილობრივი თვითმმართველობის არჩევნებში დამარცხდა. მისივე თქმით, თბილისსა და ყველა დიდ ქალაქში, დიდი ალბათობით, მეორე ტურია მოსალოდნელი.

"ნათელია, რომ თბილისში ქართულმა ოცნებამ მარცხი იწვნია მწარე და ასევე, შეგვიძლია ვივარაუდოთ, რომ დიდ ქალაქებში და საკვანძო რაიონებში არის მსგავსი ვითარება, და ყველა შემთხვევაში, რა შედეგიც არის, ყველა იმ მოქალაქის ხმის დასაფასებლად, ვინც ეს სამოქალაქო ვალი მოიხადა მთელი ამ დათვლის პერიოდში, ღამის განმავლობაში, ჩვენი აუცილებელი მიზანი არის დაცვა ყველა ამ ხმის. ჩვენ გველის, უდიდიდესი ალბათობით, ბევრი მეორე ტური,", — აცხადებს ბოკერია.

ამასთან, ბოკერია აღნიშნავს, რომ წარმოუდგენელია, მმართველმა პარტიამ არჩევნების შედეგების იმგვარი მანიპულირება მოახდინოს, რომ მეორე ტური არ დაინიშნოს.

2 ოქტომბერს 20:00 საათზე სამი სხვადასხვა ეგზიტპოლის შედეგები გამოქვეყნდა, რომლებიც ერთმანეთისგან განსხვავებულ მონაცემებს აჩვენებს. კერძოდ, Edison Research და IPSOS ამბობს, რომ თბილისში მეორე ტური იქნება, ხოლო GORBI-ის ეგზიტპოლის მიხედვით კახა კალაძეს 51,3%-იანი მხარდაჭერა აქვს.