გირჩისა და ლელოს ლიდერები, ზურაბ ჯაფარიძე და მამუკა ხაზარაძე ხუმრობენ, რომ ქართული ოცნების ოფისთან მისვლენ და მათ წინასწარგამზადებულ სცენაზე საუნდჩეკს გაივლიან. ხაზარაძე ამბობს, რომ სცენის აწყობა დასრულდა და რეპერტუარიც მზადაა.

იმის გასარკვევად, რას შეასრულებენ "ოცნების" სცენაზე, თავდაპირველად ზურაბ ჯაფარიძეს მივმართეთ. ის ხუმრობს, რომ მმართველი გუნდის ოფისში "მუსიკის სიყვარულმა მიიყვანა", მაგრამ "ზეიმისთვის" ჯერ რეპერტუარი შერჩეული არ აქვს.

მოგვიანებით, როცა ხაზარაძემ ჯაფარიძეს საუნდჩეკზე ერთად მისვლა შესთავაზა, მასაც დავუკავშირდით. მან On.ge-ს გაუმხილა, რას დაუკრავენ "ოცნების ზეიმზე".

"გიტარით მივალთ და ვიმღერებთ მე და ზურა და ალბათ მთელი საქართველოც. ორი სიმღერა მაგონდება "გამარჯვების გზებზე ვდგებით" და "აბა ულა". აბა ულა წადის ნიშნავს და ამ სიმღერით ოცნებას ვეტყვით წადითო", — ამბობს ხაზარაძე.

ჯაფარიძე ქართული ოცნების ოფისთან დღეს მივიდა. მან რამდენიმე ადამიანს ჰკითხა, როდის იწყებოდა კონცერტი, რომ გაერკვია, რომელზე მისულიყო საუნდჩეკზე. "ოცნების" ლიდერმა, მამუკა მდინარაძემ მას უთხრა, რომ კონცერტს 8 საათზე იწყებდნენ, რის შემდეგაც ჯაფარიძე ერთი საათით ადრე მისვლაზე "შეუთანხმდა".

დღეს საქართველოში ადგილობრივი თვითმმართველობის არჩევნები მიმდინარეობს. მოსახლეობა მერებსა და საკრებულოების წევრებს ირჩევს. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.