საქართველოს ახალგაზრდა იურისტთა ასოციაციის შუალედური ანგარიშის მიხედვით, არჩევნების მოახლოებასთან ერთად წინასაარჩევნო გარემო უფრო დაძაბული გახდა და იყო ზეწოლის, მუქარის სავარაუდო შემთხვევებიც.

"ორგანიზაციისთვის ცნობილი გახდა რამდენიმე თავდასხმის, ფიზიკური და სიტყვიერი დაპირისპირების ფაქტი. იყო ზეწოლისა და მუქარის სავარაუდო შემთხვევებიც. ეს საქმეები სისხლის სამართლის დანაშაულის ნიშნებს შეიცავს. საია სამართალდამცავ ორგანოებს მოუწოდებს ფაქტები სრულად გამოიძიოს, პროცესი ობიექტურად და გამჭვირვალედ წარმართონ", — ვკითხულობთ ანგარიშში.

ამასთან, ორგანიზაციის განცხადებით, მმართველი პარტია, ქართული ოცნების მხრიდან ადმინისტრაციული რესურსის გამოყენებისა და საჯარო სერვისით სარგებლობის რამდენიმე შემთხვევა გამოვლინდა.

"საარჩევნო კოდექსით, წინასაარჩევნო აგიტაციაში მონაწილეობის უფლების მქონე ნებისმიერ პირს წინასაარჩევნო პერიოდში ეკრძალება რომელიმე პოლიტიკური პარტიის ან საარჩევნო სუბიექტების კანდიდატიის მხარდასაჭერად ადმინისტრაიული რესურსის გამოყენება. საია–ს შეფასებით, ყველა მოცემულ შემთხვევაში პარტია ქართულმა ოცნებამ ეს წესი დაარღვია", — აცხადებენ ორგანიზაციაში.

საია, ასევე, ეხმაურება საარჩევნო ბანერებისა და პლაკატების დაზიანების რამდენიმე შემთხვევას. ორგანიზაციის ცნობით, მსგავსი ფაქტები გამოვლენილია, როგორც მმართველი პარტიის, ასევე ოპოზიციის შემთხვევაშიც. ამავე ანგარიშში საუბარია პოლიტიკური საქმიანობისთვის ხელის შეშლასა და სამსახურიდან პოლიტიკური ნიშნით გათავისუფლების საკითხებზეც.

მათივე ცნობით, პარტიების ნაწილი [ქართული ოცნება, ნაციონალური მოძრაობა, ლელო, ევროპული საქართველო] მოსახლეობას ვაქცინაციის უფასო სერვისს სთავაზობდა, რასაც ორგანიზაცია ამომრჩევლის მოსყიდვად აფასებს. საია-ში ამბობენ, რომ ამომრჩეველთა მოსყიდვის სხვა შემთხვევებიც აღირიცხა, რომლებიც ქართულ ოცნებასა და პარტია საქართველოსთვის უკავშირდება.

გარდა ამისა, საიას ანგარიშში მოხვდა სხვადასხვა პოლიტიკური პარტიის მიერ წინასაარჩევნოდ პროდუქტის დარიგების ფაქტებიც.

ფოტო: საია

ფოტო: საია

"წინასაარჩევნო პერიოდში აკრძალულია საარჩევნო სუბიექტების მიერ, პირადად ან ვინმეს მეშვეობით, მოქალაქეებისთვის ფულადი სახსრების, საჩუქრებისა და სხვა მატერიალური ფასეულობების გადაცემა. მოცემული შემთხვევები, თუკი ისინი სიმართლეს შეესაბამება, ამ წესის დარღვევისა და მოსყიდვის მაგალითებია", — აცხადებენ ორგანიზაციაში.

წინასაარჩევნო პროცესებს საია, გრძელვადიანი სადამკვირვებლო მისიის ფარგლებში, 9 რეგიონული ოფისის მეშვეობით თითქმის მთელს საქართველოში აკვირდება. ანგარიში 3 აგვისტოდან 24 სექტემბრის ჩათვლით განხორციელებული მონიტორინგის შედეგებს ფარავს.