საერთაშორისო გამჭვირვალობა — საქართველომ თვითმმართველობის არჩევნების კამპანიისთვის პარტიების დაფინანსების კვლევა გამოაქვეყნა, რომლის ერთი ნაწილი პოლიტიკურ კორუფციასა და სხვა ტიპის შესაძლო დარღვევებს ეხება.

TI-ის ანგარიშში ნათქვამია, რომ მმართველი პარტიის შემომწირველმა იურიდიულმა პირებმა და ფიზიკურ პირ შემომწირველებთან დაკავშირებულმა კომპანიებმა 2021 წელს (1 იანვარი-12 სექტემბერი) ჯამში დაახლოებით 122,2 მლნ ლარის ღირებულების სახელმწიფო ტენდერები მოიგეს და 4,5 მლნ ლარის ღირებულების გამარტივებული სახელმწიფო შესყიდვის კონტრაქტები მიიღეს. კვლევის ავტორების თქმით, ამ კომპანიებმა და მათთან პირდაპირ ან ირიბად დაკავშირებულმა შემომწირველებმა იმავე პერიოდში დაახლოებით 2 მლნ ლარი გაიღეს ქართული ოცნების სასარგებლოდ.

უფრო კონკრეტულად, TI-ის კვლევის მიხედვით, ყოფილ პრემიერმინისტრთან და მმართველი პარტიის დამფუძნებელთან, ბიძინა ივანიშვილთან დაკავშირებული შპს ზიმო მოხვდა მსხვილ სახელმწიფო კონტრაქტორებს შორის. ანგარიშში ნათქვამია, რომ ამ კომპანიამ წლის განმავლობაში დაახლოებით 13,2 მლნ ლარის სახელმწიფო ტენდერი მოიგო, ხოლო ივანიშვილთან და ამ ბიზნესჯგუფთან სხვადასხვა გზით დაკავშირებულმა 12-მა პირმა ქართულ ოცნებას წლის განმავლობაში ჯამში 512 000 ლარი შესწირა. როგორც კვლევაშია ნათქვამი, ამ ჯგუფში გაერთიანებული პირები თითქმის ყოველ წელს სოლიდურ თანხებს სწირავენ მმართველ პარტიას და ეს, როგორც წესი, ძალიან მოკლე დროში 1-2 დღის შუალედით ხდება ხოლმე. კვლევის ავტორები გამოთქვამენ ეჭვს, წინასწარ ხომ არ არის ეს კოლექტიური ქმედება ვინმეს მიერ ორგანიზებული და სხვა პირების მეშვეობით ხომ არ ხდება შეწირვა. როგორც ცნობილია, ქართული კანონმდებლობით მესამე პირის მეშვეობით შემოწირულების განხორციელება იკრძალება.

TI-ის ანგარიშში ნათქვამია, რომ სხვა წლების მსგავსად, ასევე, დიდ ყურადღებას იქცევს შპს არსაკიძე-2000, კომპანია, რომელმაც 2021 წელს დაახლოებით 4 მლნ ლარის სახელმწიფო ტენდერები მოიგო. კვლევის მიხედვით, ამ კომპანიის მფლობელები ამავე დროს დაკავშირებული არიან შპს ლილო-მოლთან — მსხვილ ბიზნეს ჯგუფთან, რომლის პარტნიორები წლების განმავლობაში ერთ-ერთი ყველაზე მსხვილი პოლიტიკური დონორები არიან და ისინიც, ბიძინა ივანიშვილთან დაკავშირებული პირების მსგავსად, მოკლე დროის შუალედში სწირავენ ხოლმე ფულს მმართველ პარტიას. TI-ის ინფორმაციით, ამ ჯგუფში შემავალმა 15-მა პირმა წელს მმართველ პარტიას ჯამში 670 000 ლარი შესწირა.

საერთაშორისო გამჭვირვალობა — საქართველოს კვლევაში გამოყოფილია ეს კომპანიებიც: შპს საგზაო სამშენებლო სამმართველო №1 და შპს საგზაო სამშენებლო სამმართველო №2. ორგანიზაციის ინფორმაციით, ამ კომპანიებმა წლის განმავლობაში ჯამში 23 მლნ ლარის ტენდერები მოიგეს, ხოლო კომპანიების მფლობელმა, ნუგზარ აბალაკმა და მისმა ბიზნეს პარტნიორმა, ავთანდილ კაჭკაჭიშვილმა ქართულ ოცნებას ჯამში 45 000 ლარი შესწირეს.

TI-ის ანგარიშის მიხედვით, შპს არალმა, 2021 წელს 20,6 მლნ ლარის ტენდერები მოიგო, მისმა მფლობელმა, დემეტრე თათეშვილმა კი მმართველი პარტიის ყულაბაში 50 000 ლარი შეიტანა. როგორც კვლევაშია ნათქვამი, თათეშვილთან დაკავშირებულ კორუფციულ რისკებზე საერთაშორისო გამჭვირვალობა — საქართველო ადრეც საუბრობდა.

კიდევ ერთი კომპანია, რომელიც კვლევის მიხედვით 10 ყველაზე მსხვილ სახელმწიფო კონტრაქტორს შორის მოხვდა, არის შპს იბოლია, რომელმაც ქართულ ოცნებას 20 000 ლარი შესწირა. როგორც ანგარიშშია ნათქვამი, ამ კომპანიის, მისი მფლობელის, ყოფილი დეპუტატის, იოსებ მაკრახიძის და მისი ოჯახის წევრების კომპანიების მიერ საეჭვო გარემოებებში ათეულობით მილიონი ლარის ღირებულების სახელმწიფო შესყიდვების კონტრაქტების მიღებაზე საერთაშორისო გამჭვირვალობა — საქართველოს, ასევე არაერთხელ უსაუბრია.

კვლევა ეხმიანება აგვისტოში გავრცელებულ ინფორმაციას, რომ სამცხე-ჯავახეთში მხარის რწმუნებულმა, სახელმწიფო უსაფრთხოების სამსახურის და ფინანსთა სამინისტროს საგამოძიებო სამსახურის სამხარეო ხელმძღვანელებმა ადგილობრივ ბიზნესმენებს სავარაუდოდ დაავალეს მმართველი პარტიის სასარგებლოდ ფულის შეწირვა. კვლევის ავტორების თქმით, გადამოწმების შედეგად აღმოჩნდა, რომ 2-16 აგვისტოს პერიოდში მმართველ პარტიას სამცხე-ჯავახეთიდან 87-მა ფიზიკურმა და 5-მა იურიდიულმა პირმა ჯამში 714 000 ლარი შესწირა. ანგარიშში მითითებულია, რომ ასეთ მოკლე დროში, ერთი გეოგრაფიული არეალიდან განხორციელებული შემოწირულებების ეს ოდენობა საკმაოდ უჩვეულოა და შესაძლოა წარმოადგენდეს გავრცელებული ინფორმაციის არაპირდაპირ მტკიცებულებას.

ორგანიზაცია რეკომენდაციას გასცემს და აცხადებს, რომ აუცილებელია, პროკურატურამ დაიწყოს გამოძიება სამცხე-ჯავახეთში ადგილობრივ ბიზნესმენებზე განხორციელებული ზეწოლის სავარაუდო ფაქტებზე, და შეისწავლოს ხომ არ ჰქონდა ადგილი მსგავს შემთხვევებს საქართველოს სხვა რეგიონებშიც.

TI-ის ანგარიშში ნათქვამია, რომ როგორც ჯამურად მიღებული შემოსავლების, ისე გაწეული ხარჯების მხრივ (თითოეული 12 მილიონამდე იყო) მმართველი პარტიის ფინანსები ერთად აღებული დანარჩენი 12 პარტიისას თითქმის 2,5-ჯერ აღემატებოდა, რაც პარტიებს შორის ფინანსების უკიდურესად არათანაბარ გადანაწილებაზე მიუთითებს, ეს კი საარჩევნო გარემოს აზიანებს.

გაიგეთ მეტი: